Ñahendu Hesu. Domingo de Pascua

Escucha el evangelio y la reflexión en: https://youtu.be/HcuYl_-5LE0

Domingo I Pascua (misa del día)

20, 1 – 9

Domigo pyharevete, pytũ ramo hína gueteri, María Magdaléna oho pe itakuápe Jesús oñeñotỹ haguépe. Ojuhu ojepe’a hague pe ita ombotýva pe itakua juru. Pya’e oho Simón Pedro ha ku disípulo Jesús ohayhuetéva rendápe, ha he’i chupekuéra:— Ojereraha niko Ñandejára retekue pe itakuágui, ha ndoroikuaái moõpa oñemoĩ.

Upépe, Pedro ha pe Jesús disípulo pya’e osẽ oho pe itakuápe. Odipara oho hikuái ojoykére,
upéi katu pe ambue hatãve oho Pédrogui ha ha’e raẽve oguãhẽ. Ojayvy omaña pe itakuápe
ha ohecha umi ao Jesús retekue ojelia vaekuépe oĩmbaha upépe. Ha’e katu ndoikéi.

Hapykuéri katu oguãhẽ Simón Pedro, ha oike pe itakuápe. Ha’e ave ohecha umi ao.
Ohecha avei pe ao Jesús akã ojelia haguépe oñembyapu’a hague ha oñemoĩ hague ambue
hendápe ha’eño.

Upépe oike avei pe Jesús disípulo, pe oguãhẽ raẽve va’ekue. Ha ohechávo mba’épa ojehu, ha’e oguerovia Jesús oikove jey hague. Upérõ jepe niko ndoikuaái hikuái mba’épa he’ise ku Ñandejára Ñe’ẽme he’írõ Jesús oikove jey va’erãha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñane pore’ỹramo upe jahayhúvagui niko ho’a ñande ári pytũ, peteĩ ita guasu oĩ ramo guáicha ñane akã ári, ndaikatúiva jaipe’a ñane ño, nañandepu’akái ha ñande rasapáva.

Upéva hína upe oñandúva umi disípulo, kuimba’e ha kuñanguéra omoirũ va’ekue Hesúpe
Omano rire opyta hikuái ityre’ỹ Ñandejáragui, oñembyasy, ndovy’ái, okañy oimoã hikuái opamaha upe Hesu omoñepyrũ va’ekue hendivekuéra.

Ñandejára katu omopu’ã Hesúpe omanóva apytégui, oipe’a pe ita guasu ombotýva pe sepultúra ha oipe’a avei pe kyhyje ha ñembyasy umi Hesu irũ nguéra py’águi. Ome’ẽ jevy ichupekuéra vy’a ha esperánsa. Ndopái upe Hesu omoñepyrũ va’ekue.

Jahasáramo jepe che irũ ha che reindy ára pohýi ñanemokangy ha ñanembopy’a rasýva, arai hũ oúva ñande ári mba’asy vaícha, ñama’ẽ Hesúre ogueropu’aka va’ekue hetaite jehasa asy ñande rayhupápe omano meve. Ha jajerovia Ñandejára omopu’ã haguéicha Hesúpe ñemanógui jepe, ñanerenohẽtaha avei ñandéve iporãve haguãme.

ÑAÑEMBO’E TUPASÝME

María, rejajáiva ore rapépe opa araite rehechaukávo ikatuha rosê jejopy vaígui ha roha’arõ
ára iporãvéva. Ore niko rojerovia iterei nde rehe, ha’éva tesãi hasývape guarã, kurusu ykére
reñemopeteî va’ekue Jesús ndive ijehasa asýpe, reñemohatãvo upépe nde jeroviápe.

Ore roikuaa porã ore pytyvõtaha, rohupyty jey haguã tory ha vy’a oñondive, rohasa rire ko’ã
ára pohýi ijetu’u etéva. Ne mánto guýpe roju roñemo’ã Tupãsy marangatu. Aníkena eheja
rei ore ñembo’e asy rojejopy vai ete jave, ha ore pe’a kena opa mba’e vaígui, Tupãsy marangatu, rejajái ha remimbíva. Amén.

Pa’i Alberto Luna.