Ñahendu Hesu. Sábado Santo

Escucha el evangelio y la reflexión en: https://youtu.be/iHQQ1Oz-wEM

Vigilia Pascual Sábado Santo Ciclo B

Marcos 16, 1 – 8

Pytu’uha ára ohasa rire, María Magdaléna, María Santiágo sy ha Salomé, ojogua mba’e ryakuã porã omona hag̃ua Jesús retekuére. Ha upe Domíngo pyhareve, kuarahy osẽvo, oho hikuái Jesús oñeñotỹ haguépe. He’i ohóvo ojupe hikuái: — Mávaiko oipe’áta ñandéve pe ita pe itakua jurúgui.

Ha omañávo hese katu, ohecha hikuái pe ita oñembojeréma hague hendágui. Ita ndetuicháva va’ekue niko péva. Ha oikekuévo pe itakuápe, ohecha hikuái peteĩ mitãrusu ijao morotĩ pukúva, oguapýva hína pe itakua yképe. Tuicha oñemondýi hikuái. Ha’e katu he’i chupekuéra:

— Ani peñemondýi. Peẽ peheka hína Jesús Nazaretguápe, ku oñemosãingo va’ekue
kurusúre. Ndaipóri véima ápe. Oikove jeýma. Peike pehecha pe oñemoñeno hague.

Upéi tapeho peje idisípulokuérape, ha Pédrope ave, Jesús ohoha hína ko’ág̃a henonderã
Galiléape. Upépe ohecháne chupe hikuái, ha’e he’i haguéicha chupekuéra.

Upépe umi kuña osẽ odipara pe itakuágui. Osusũmba ohóvo hikuái. Ha mba’eve nde’íri avavépe tuichaiterei oñemondýigui hikuái.

ÑAMBOGUEJY ÑANDE REKOVÉPE
“Ou vai vove ou vaipa.” He’i ningo ñe’ẽ. Ha peichaite oñeñandu umi apóstolkuéra Hesu ojejuka rire ára ko’ẽme. Isarambipa hikuái, okañy ha oñembotypa, okyhyjégui oiko hesekuéra pe Hesúre oiko va’ekue. Ndoikuaái mba’éichapa osẽta pe javoráigui ha mba’épa ojapóta.

Heta iñesperánsa va’ekue Hesúre, heta milágro ohecha ojapo ha umi iñe’ẽngue arandu ndoguéi ipy’águi. Oha’arõ kuri hikuái imbo’ehára opytataha tetã Israel mburuvicha guasu ramo, Ñandejára pu’aka rupive. Ko’ãga Hesu oñeñotỹ peteĩ ita guasu guype. Umi kuña oho hendápe ha ndoikuaái mávapa oipe’áta pe ita guasu.

Mba’etépa nde reñandu hína ko’ãga che reindy ha nde che irũ, pe ita guasu oiméva nde rekovépe ha omongañyva nde hegui vy’a, py’a guapy ha jerovia. Mba’épa upe nemongyhyjéva, ne apytĩva, nde jokóva, ndohejáiva Hesu oikove jey nde rekovépe.

He’i San Pablo umi Rrománope: “Máva piko ikatúta ñande pe’a Hesukrísto mborayhúgui.

Jehasa asy piko, mba’e mbyasy, ñañemuña, ñanembyahýi, ñande opívo térã ñamano vai piko. Arovia che py’aite guive -he’i- mba’eve na ñande pe’a mo’ãiha Tupã mborayhúgui: tañamano jepe ra’e. Ndaipóri pokatu ha pu’aka, ko’agãgua térã ou va’erãva, pu’aka yvategua ha yvy pegua. Mba’eve ndaikatu mo’ãi ñande pe’a pe

mborayhu Tupã ohechauka vaekuégui ñandéve, Ñandejára Cristo Jesús rupi.

Pa’i Alberto Luna.