Ñahendu Hesu. Domingo Semana 23° TO

Escucha el evangelio y la reflexión en: https://youtu.be/RSgS8gFwYiY

Domingo 23 a TO Ciclo A

Mateo 18, 15 – 20

Uperõ Jesús he’i idiśipulokuérape: Nde rapicha ojapórõ nde rehe ivaíva, eñe’ẽ chupe
ha’eñoháme. Ehechauka chupe moõpa ojavy. Ne rendu ramo, pepyta porã jeýne. Na ne
renduséirõ katu, ehenói peteĩ térã mokõime, tohendu opa pejéva. Ñandejára ñe’ẽme niko
he’i opa mba’e oje’éva, oje’e vaerã mokõi térã mbohapy rovake.

Ha chupekuéra nohenduséirõ katu, eikuaauka opavave rovake tupaópe. Ha upépe nohenduséirõ katu, pereko chupe pende rehegua’ỹva ramo térã impuésto ocobráva Rómape g̃uarãicha ramo.

Añete ha’e peẽme, opa mba’e peẽ peñapytĩva ko yvy ári, Tupã oñapytĩta yvága guive. Ha
opa mba’e peẽ pejoráva ko yvy ári, Tupã ojoráta avei yvága guive.

Ha’e porãta peẽme, mokõi peñemoĩrõ peteĩ ñe’ẽme pejerurévo oimeraẽ mba’e che Ru
yvágape oĩvape, ha’e ome’ẽ va’erã peẽme. Ha mokõi térã mbohapy oñembyatýrõ che rérape,
upépe aiméta che, hendivekuéra.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Ñande rapicha fajútore niko ñanemandu’a katuete, ñañe’ẽ ha jakopi hese ñande aty
jave. Ñamonambi raku ñande rapicha. Sa’i nungánte jaha hendápe ja’e ichupe hembiapo vai
ojei haguã tape karẽgui. Ijetu’u voi ningo péva. Lo mitã ombohasánte, nombokachaséi
kavichu’i raity.

Hesu katu he’i jaha vaerãha ñañe’ẽ porã ñande rapichápe ofalláramo ñanendive.
Ñañemboja hese ñaipytyvõ haguãicha, ndaha’éi py’arópe. Ha oiméramo ñañandu ñande
pochy ha jakapu vaitaha mba’e, iporãvénte ñambohasa imi, ñañembo’e hese, ha upéi ñande
py’aguapy vove jaha ñañemongeta porã. Ñanerendúramo ñagana ñande rapicha, he’i Hesu.

Nañanerenduséiramo katu jaheka ambue oñemoñe’ẽ va’erãva ichupe, ha tekotevẽramo
ñambojovake aty guasúpe, komunidápe. Ñañeha’ã hese osẽ haguã javoráigui.

Ha upe ja’e háicha ñande rapichápe, ñande avei, che irũ ha che reindy, ñaime vaerã
ñahendu haguãicha oje’éramo ñandéve ñande fálla. Ñande jopi ha ñane ko’õramo jepe, ani
jajetyvyro ha ñande pochy vai upévare. Ndaipóriko noikotevẽiva ñepohãno. Ha la pohã
niko ndaha’éi karamélo. Opáichavo, ja’u mante ani haguã ñande ruguái puku eterei jepe.

ÑAÑEMBO’E OÑONDIVE

Ñandejára Hesukrísto, nde niko ere vaekue opa mba’e mborayhu pópe, reipotágui oñesẽ
Aña poguýgui. Eme’ẽ oréve pe py’a porã ore avei ro’ekuaa haguã ore rapichápe ofalláramo
ore ndive. Ha ore rofalláramo, rohendukuaa haguã umi oúvape oñemoñe’ẽ oréve. Amén.

Pa’i Jasy.