Ñahendu Hesu. Domingo Roque González ára

Escucha el evangelio y la reflexión en: https://youtu.be/mAw9dh4o5Qs

15 noviembre: Roque González ára

Marcos 16, 15-20

Upérõ Jesús ojechauka umi 11 apóstolkuérape, ha he’i chupekuéra:

Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta. Umi oguerovia’ỹva katu oñehundíta. Umi che rehe ojeroviáva heta milágro ojapóne.

Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupe kuéra. Ipópe ojagarráne mbói térã ho’u ramo venéno ndojehúi chéne chupekuéra mba’eve. Omoĩne ipo hasývare ha umíva okueráne.

Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy ha’e Tupã ykére. Idisípulo kuéra katu osẽ omombe’u pe ohasa va’ekue oparupiete. Ha Ñandejára oipytyvõ manté chupe kuéra. Umi milágro ojapóva rupi ojehecha añeteha umi mba’e ha’e kuéra he’íva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko árape ñanemandu’a hína San Roque González, ñane sánto paraguayo, onase va’ekue Paraguaýpe. Ha iñirũ nguéra España gua Alonso Rodríguez ha Juan del Castillo.

Mbohapy véva pa’i hesuíta ojejuka vaekue 1628 pe. Hendivekuéra ojejuka avei raka’e
Arasunu. Peteĩ casíke guarani itujámava ha omoirũva ichupeKuéra upe jave.

Roque ru niko karai González Villaverde, España gua. Escribano vaekue, ha la isy je raka’e peteĩ kuñakarai mehtísa, heráva María Santacruz. Aipóramo ningo la San Roque agüela ra’e peteĩ india guarani raka’e. Ha upéicha rupi niko la Roque oikuaa porã umi guaranikuéra.

La isy voi ningo he’ímiva ichupe: Umi guarani ko ñane héntekuéra hína che memby, ne pehengue tee hína hikuái. Ha upéicha la Roque ou ohayhu ha ojepokuaa hesekuéra ha oikose pa’íramo hendive kuéra, oguata haguã oñondive Ñandejaŕa Hesukrísto rapére.

Roque ningo oiko mboyve hesuíta, oiko raka’e pa’i diocesano, ha oho oike ka’aguýre umi guaraní kuéra rendápe amo Mbarakaju rupi. Upéi oñehenói Paraguaýpe.

Ojapo ichugui hikuái párroco la Catedral pe, 10 áño rupi. Upe rire katu oike hesuitarã áño 1609 pe. Oho imi Chákope umi guaikuru rendápe oiko hendive kuéra. Ha upéi katu oho Misiones pe, San Ignacio, Encarnación ha Posadas, ha hetave pueblo niko ha’e omoñepyrũ vaekue. Ombyaty haguã upépe guarani kuéra isarambi ha ityre’ỹva upérupi.

Roque ojapo umi apóstol kuéra ojapo haguéicha, osẽva opárupi ombo’e Ñandejára Hesukrísto ñe’ẽ. Hetaiterei okorre ñande rapicha ha oñeha’ã guaranikuéra rayhupápe ojejuka peve. 52 áño orekópe. Ha Ñandejárape ojuka haguéicha umi ipueblogua voi, umi guarani apytégui avei opu’ã raka’e Roque jukaháre.

Mba’épa he’íne ñandéve San Roque ohechávo mba’éichapa oime ñane retãme umi indígena kuéra, ha’e ohayhuetéva. Mba’épa reñandu che irũ ha nde che reindy.

Pa’i Alberto Luna.