Ñahendu Jesús Ñe’ẽ. Jueves 2º Adviento

Escucha el evangelio y la reflexión en: https://youtu.be/iBvt-HnJib8

Jueves 2° de Adviento

Mateo 11, 11 – 15

Upérõ Jesús he’i umi ijatývape ijerekuévo: Añetehápe ha’e peẽme, ndaipóri yvypórakuéra apytépe mba’e guasuvéva Juan Bautístagui. Opáichavo, pe michĩvéva Tupã Ñandejára Rréinope, upéva mba’e guasuve chugui.

Juan Bautista ouha ára guive ko’ágã peve Ñandejára Réino ijetu’u, ha umi oñeha’ãva ha ipyapýva mante oike ipype. Juan ou mboyve niko Moisés ha proféta kuéra imandu’a Ñandejára Rréinore, ha peẽ peroviase ramo umíva ñe’ẽ, Juan hína proféta Elías, pe oje’eva’ekue outaha. Ohendúvake tojapysaka porã.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oje’éva niko ñandéve ja’e vaerãha upe añeteguáva. Naiporãiha ñande japu térã ñakirirĩ ha nañamombe’úi jaikuaáramo ojejapoha ivaíva. Oĩ niko ikatuhápe ja’e upe añeteguáva ha ñande rapicha ndaipochýi ñane ndive.

Oĩ katu ndaikatúiva voi ja’e chupe mba’eve, añeteguáva ramo jepe, ñandu kavajúicha opu’ãva ñañatõiramo. Umívagui jakyhyje voi ñañemboja haguã. Karai guasu térã mburuvichápe já’e haguã upe hembiapo vai ijetu’u ha iñakã jagua.

Jakyhyje niko oúramo guarã ñande ári ha ñande reraháramo guarã henonderã mba’e. Ha upéicha heta vése jajejoko jahecháramo ojapo ivaíva térã he’i hendape’ỹva. Ñakirirĩ guasúnte voi, ñañemolentehũ ha ñambohasánte.

Ñahendu niko Hesu imandu’a Juan Bautísta rehe. Ha he’i hese ndaiporiha yvypórakuéra apytépe imba’e guasuvéva chugui. Ha’e niko oñemomichĩramo jepe, naipy’amirĩri vaekue he’i haguã upe añeteguáva. Upéicha oñe’ẽ vaekue kyhyje’ỹre umi soldádokuérape, pa’i kuérape. Opavavépe he’i hovaitépe upe tekotevẽva omyatyrõ.

Rréi Heróde renondépe ndaipyta ryrýi va’ekue he’i haguã chupe hembiapo vaikue. Ha upévare oho kárselpe, ha ojejuka nokirirĩ haguére.

Umi profeta py’aguasu Juan Bautístaicha, oiméva ohasa haguãicha jeiko asy pa’ũrupi ha ndoguevíriva he’i haguã añeteguáva avave renondépe, umichagua ñaikotevẽ avei ñane retãme ha ñande Iglésiape.

Ehechápa hína che irũ ha nde che reindy, mba’érepa Jesús he’i pe Ñandejára Rréino ijetu’uha. Ha tekotevẽha ñande py’a guasu ha ñañorairõ Aña rymba kuéra ndive jaike haguã ipype. Tañanembopy’a guasu Jesús aipóramo. Ani ñanepy’a mirĩ ñande.

Pa’i Alberto Luna.