Ñahendu Jesús Ñe’ẽ. Jueves Epifanía rire

Escucha el evangelio y la reflexión en: https://youtu.be/olLZF36X55s

Jueves Epifanía rire Lucas 4, 14-22a

Jesús katu oho jey Galiléape, henyhẽ Espíritu Sántogui. Ombo’e oikóvo tupao rupi ha maymáva oguerohory chupe. Opa rupi herakuã.

Jesús oho Nazarétpe, upe okakuaa haguépe. Ha pytu’uha árape, ojapo háicha jepi voi, oho tupaópe. Ha oñembo’y omoñe’ẽ haguã Ñandejára Ñe’ẽ, ome’ẽ chupe hikuái proféta Isaías kuatia. Ha oipe’ávo ojuhu he’ihápe: Ñandejára Espíritu ou chéve.

Che poravo haguére araha haguã marandu porã opa imboriahúvape. Chéve che mbou aipe’ávo jejopýgui umi préso oĩvape,
ahesape’ávo umi ohecha’ỹvape, ha ajorávo opa ohasa asýva. Ha amyerakuã haguã «Oguãhẽmaha ára Ñandejára ñande salva haguã».

Upéi katu Jesús omboty pe kuatia, ombohasa jey pe ome’ẽ va’ekuépe chupe, ha oguapy. Ha oñemañamba joa hese. Upéi oñe’ẽ ha he’i: — Péina ko’ágã ou ojehu upe pehendu va’ekue.

Opavavénte oñe’ẽ porã Jesús rehe ha oguerohory umi mba’e he’íva.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

He’i ningo peteĩ ñe’ẽnga: “Mboriahu sosieda ha jagua kolléra ndopa porãi.” Ha he’i avei purahéi: “Mboriahu menda jagua ñuguaitĩ, katuete ñorairõ harã.” Ha upéicha mboriahu ojejopýramo sa’i oha’arõ ñepytyvõ hapicha mboriahúgui. Oha’arõ uvei mburuvichágui, autoridakuéragui, karai guasúgui, ojepokã yvategua rehe.

Oĩ niko ojesarekóva yvate ha oha’arõva ñande gobierno ñandepe’a jejopýgui. Presidente, ministro, diputado, gobernador, intendente, concejalkuéra, toñemomýi ha tañanemboguata tenonde gotyo. Heta oimo’ãva yvatéguio mante ou vaerã ikatúva ñande pe’a jejopy vaígui ha ñanesambyhy tape porãre.

Jahecha Jesús oguahẽ ivállepe, ha upépe he’i Ñandejára salvación oguahẽmaha ijapytépekuéra hese ae. Ñandejára Espíritu oguapy Jesús ári, ha’éva peteĩ ha’ekuéra guáva. Jesús ndaha’éi mburuvicha.

Upéva ha’e vaekue Herode. Ndaha’éi gobernador, upéva ha’e vaekue Pilato. Ndaha’éi pa’i guasu, umíva ha’e va’ekue Anás ha Caifás. Ndaha’éi va’ekue Moisés léi mbo’eha.

Jesús ou Ñandejára pueblo pa’ũgui. Ñandejára Espíritu oguapy hi’ári. Oiporavo ichupe oisãmbyhy haguã hetãme tape porã rehe. He’i haguéicha Tupãsy María: “Ñandejára omongúi mburuvicha kuéra iguapyhágui ha ohupi umi imirĩ ha ndojejapóivape.”

Mba’épa reñandu nde che irũ ha che reindy. Mba’éichapa ikatúne ñande jahupyty ko Ñandejára salvación ndoúiva poguasu ha arandu kuéragui, ha oñembohapéva ñandéve guarã umi ndojejapóiva apytépe.

Pa’i Jasy.