Ñahendu Jesús Ñe’ẽ. Jueves Epifanía rire
8 enero, 2025Ñahendu Jesús Ñe’ẽ. Jueves 1º Tiempo Durante el Año
15 enero, 2025
Escucha el evangelio y la reflexión en: https://youtu.be/pFXEdEAtg-4?si=sYoO9oDXon6kgNp4
Ñandejára Jesucristo ñemongarai Ciclo C
Lucas 3, 15-16. 21-22.
Upérõ umi ohóva oñemongarai Rio Jordán pe opondera joaite, ha oikuaase hikuái ndaha’éipa Juan upe Mesías. Juan katu osẽ he’i chupekuéra: — Che niko pomongarai ýpente. Oime katu peteĩ oútava ha pene mongaraítava Espíritu Santo ha tatápe. Ha’e imbareteve chehegui, ha nda’ijáiva chéve ajora chupe isapatu sãnte jepe.
Juan omongaraipa rire umi hendápe ou vaekuépe, ou ave Jesús oñemongarai haguã. Ha Jesús oñembo’e jave hína, upe yvága ojepe’a, ha ku pykasúicha oguejy hi’ári Espíritu Santo. Yvágagui oñehendu peteĩ oñe’ẽva, ha he’íva: — Ndéko hína che ra’y ahayhúva, che py’a rembohorýva.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ñaha’arõ niko gobierno porã ñane retãme. Ha upe aja mburuvicha kuéra ha’eteku noñemoĩ mo’ãiva voi peteĩ ñe’ẽme. Oĩma voi ikane’õva, ikueráiva. Oipotáva ou peteĩ kaudíllo mbarete ombokacháva ñane retã peteĩ yvyra mátaicha, oitypa osaingo hágui umi yva tuju ha omombopa.
Upéicha avei umi Israelgua Juan Bautísta javegua ikuerái huvicha kuéragui. Roma gua ojopy eterei, mbaretépe omoñesũ tetã Israélpe ha oipyte chugui huguy peteĩ mbopi guasúicha impuésto pohýi rupive. Herode oñorairõ rangue hetãre oñemoirũ hese kuéra ha okaru avei jatevúicha hetãgua kuérare. Ha umi pa’i ruvichakuéra katu oiko kyhyje pópe oñangareko pe tupao guasúrente ha nomoirũi mboriahúpe.
Upe jave oguahẽ Jesús oike upe aty guasu pa’ũme. Ha’e ndosapukái, ndojapói kampáña. Nde’íri omosẽtaha umi rrománo kuérape mbaretépe. Ndoúi ojupi haguã tetã Israel mburuvicha guasúrõ. Jesús ojehe’a ha oguata opavave apytépe, ndojapói pararã guasu oguahẽvo. Mbeguekatu ombyaty ijerére ha’eichaguáva iñirũrã. Oike ohóvo pueblo apytépe ha oñepyrũ hendive kuéra jeguata pyahu iguy guive.
Ha péva pe Jesús omýi lája Ñandejára ohecha porã. Ha ikarai rire oñe’ẽ yvága guive he’ívo ichupe: ‘Ndéko hína che ra’y ahayhúva, che py’a rembohorýva’.
Ha péva hína la konvíte che irũ ha che reindy. Jaguejy, ñañemoaguĩ, ñañomoirũ ñande rapicha oguataséva tape pyahu rupi Jesús ndive. Ñañemopeteĩ jeroviápe ha ñamba’apo tekove pyahúre. Ñañeorganisa ñande komunidápe, ñañepyrũ ñande avei iguy guive Jesús oñepyrũ haguéicha.
ÑAÑEMBO’E OÑONDIVE
Ñandejára Jesucristo, eju va’ekue eike ore apytépe ejejapo’ỹre, emoirũ ha eipytyvõ opavavépe. Orembo’emína ore avei roguata haguã ndéicha ore irũnguéra apytépe. Amén.
Pa’i Alberto Luna.