Ñahendu Jesús Ñe’ẽ. Jueves Semana 22° TO

Escucha el evangelio y la reflexión en: https://youtu.be/yxgr6CLCPeQ

Jueves 22 a TO

San Lucas 5, 1 – 11

Upe jave, Jesús oñembo’y hína lágo Galiléa rembe’ýpe. Ijatypa joa ijerére géntekuéra
ohendu haguã Ñandejára Ñe’ẽ. Pe y rembe’ýpe, Jesús ohecha mokõi kanóa.

Ohecha nandiha, ijára kuéra oguejy ra’e omopotĩ haguã irréd. Jesús ojupi peteĩme, Simón mba’évape, ha ojerure chupe oñemomombyry’imi haguã pe y rembe’ýgui. Ha oguapy pe kanóape, ha upe guive ombo’e opavavépe. Oñe’ẽmbávo, he’i Simónpe: — Jaha amo hypyvehápe, ha upépe epoi nde rred.

Simón katu osẽ he’i chupe: — Mbo’éhára, pyhare pukukue niko romba’apo kuri ha
mba’evete ndoroitýi. Ko’ágã katu, nde eréguinte, apoíta.

Ha péicha ojapo. Hetaiterei pira niko oity hikuái, ha irred katu osoróta katuete. Upémarõ
ohenói hikuái hapicha kuérape na mombyrýi oĩva hína, ou haguã oipytyvõ chupekuéra.

Ou hikuái. Ha mokõive kanóa omyenyhẽte hikuái, ha ipahápe haimetéma oñapymi.
Simón ohechávo upéva, oñesũ Jesús renondépe ha he’i chupe: — Ñandejára, anietéke
eja che rehe. Che niko pecador.

Simón ha iñirũ nguéra, ha upéicha avei Santiago ha Juan, Zebedeo ra’y mokõive, tuicha
oñemondýi ohechávo mba’eichaitépa heta umi pira oitýva hikuái. Jesús katu he’i
Simónpe: — Ani rekyhyje. Ko’águi rire renohẽta génte ndaha’éi pira.

Upéi katu omboja hikuái pe y rembe’ýpe ikanóa kuéra. Ohejapa oguerekomíva ha oho
Jesús ndive.

Ñandejára Jesucristo Ñe’ẽ.

HA ÑAMBOGUEJYMÍNA KO ÑANDEJÁRA ÑE’Ẽ ÑANDE REKOVÉPE…

Umi ohóva peskádape niko oipotáramo pira guasu oike va’erã hypyve hápe.

Opytáramo y rembe’ýpe, oríllape, piky ha pira’ínte ojuhúta. Oñemombe’u ñandéve
mba’éichapa Jesús oike raka’e Pedro kanóape, ani haguã ojopypa ichupe umi hénte. Ha pe orílla guive oñe’ẽ ha ombo’e hetápe. Ha péicha Pedro oñepyrũ raka’e oipytyvõ
Ñandejárape, omopa’ũ imi hembiapo ha oiporuka ichupe hembiporu.

Ñande avei niko ñamopa’ũ ñane rembiapo ha jahámiva avei ñembo’épe, mísa hápe ha ñahendu mimíva Ñandejára ñe’ẽ ha mba’e, jaheja Ñandejára ojevale imi avei ñande rehe.

Péicha ha’e oike ohóvo ñande rekovépe. Ha jahecháma katu uperire Jesús he’i Pédrope: Jaha chendive jaike pe hypyve hápe, ha upépe epoi nde rred. Pedro katu ndojeroviapáiramo jepe he’i Hesúpe: Nde ere haguérente aháta.

Ikatúko hína che irũ ha che reindy oime ñandéve avei Hesu ñane renói hína ko’ãga jajepoi haguã hendive hypyvehápe ñane compromisope, anive japyta oríllaguinte ñama’ẽ, anivéma ñane pererĩ.

Ha umi pira renohẽha oike háicha hypyve hápe onohẽ haguã pira kakuaa ha iporãva, ñande avei jaipota ramo ñande rekove ha ñane rembiapo Jesús ndive osẽ porã ñandéve tuicha háicha, jajepoíma va’erã upe hypyve hápe. He’i haguéicha Jesús Pedro pe he’i ñandéve avei: Ani rekyhyje, che rombo’éta.

Pa’i Jasy.