Ñahendu Jesús Ñe’ẽ. Viernes 22º Durante el Año

Escucha el evangelio y la reflexión en: https://youtu.be/oa_gz-p8Xe0

Viernes 22º Durante el Año San Lucas 5, 33 – 39

Upérõ umi fariséo ha Moisés léi mbo’eha he’i Jesúspe: — Umi Juan Bautista ha umi fariséo disípulokuéra niko py’ỹinte o’ajuna ha oñembo’e manté. Nde disípulokuéra katu niko jekaru ha víno je’úpente oiko.

Jesús he’i chupekuéra: — Mendahápe oúva piko opyta ho’u’ỹre mba’eve pe ména pyahu oĩ aja hendivekuéra. Nahániri. Ágãnteko oguãhẽ va’erã ára ipore’ỹvo ha’e. Upépe ohasáne hikuái ho’u’ỹre mba’eve.

Omombe’u avei chupekuéra ko káso: Ao tuja niko nañarremendái ao pyahu pehẽngue reheve. Péicha ojapóva niko ohundi pe ipyahúva. Ha upéi ave, pe ao pyahu pehẽngue opyta vai pe itujávare. Péicha ave, víno pyahu niko nañambohyrúi víno ryru tujápe.

Péicha jajapórõ pe víno hyjúine ha ovu, ha ojoka pe hyru. Ñahundi pe víno ha hyru ave. Víno pyahu ñamoĩ va’erã hyru pyahúpe.

Umi víno ho’úva niko ndo’úi víno pyahu itujáva ho’u rire. He’i hikuái: “Víno tuja heve.”

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“La suérte ñagueroko’ẽnte”. He’i ningo ñe’ẽ. Ha “degrásiarã ndajaha pukúi” oje’e avei. Opaichagua mba’e niko jahasa ñande rekovépe. Sapy’ánte ñagueroko’ẽ mba’e porã, ha sapy’ánte katu ou ñande ári arai hũicha pe jejopy vai.

Natekotevẽiete jaheka, oúnte ñahenói’ỹre. Iporãramo oúva javy’akuaa oñondive, ja’agradese Ñandejárape ha ñambyaty mbarete jaropu’aka haguã jehasa asy ñande rupyty vove. Ikyráramo la teju jakaru hese, ha ipiru vove ñambohasa ikatumi háicha. Ñañopytyvõ ha ñamboja’o, jaikuaa pype outaha ára iporãvéva uperire ha Ñandejára ome’ẽha ñandéve upe pu’aka ñaikotevẽva ñambohasa haguã jejopy vai.

Upéva he’i Jesús umi tapicha oúva ohecha vai umi apóstolkuéra ndojapoiha ajúno umi judío kuéra ojapo háicha. Natekotevẽi ñande ñamoĩ ñande ári jehasa asy, oútagui hi’árape umíva ha oúvo ñambohasakuaa va’erã jerovia ha py’a porãme. Ha upéi avei Jesús he’i chupekuéra káso rupive, ha’e ogueruha peteĩ léi pyahu, ha tekotevẽha ha’ekuéra ojeheja upe iléi yma guarégui ha oñesambyhy hese. Naiporã mo’ãi chupekuéra oguataséramo hendive ha ojapose jeýramo upe iléi tuja he’i háicha.

Jesús rapére jaike peteĩ tape pyahúpe, jaguerova upe ñande guata yma. Jajehejáma umi ñande jepokuaaha vaígui, nañapenavéi yma guarére. Ñamboykéma Aña rembiapo ñanembyaíva. Pévako hína, che reindy ha nde che irũ, jaguata akambýramo ndajaha mombyry mo’ãi. Ha amo ipahápe vyropápe ñasẽta ñaína mokõive ñamboguataséramo, ñande laja vai tuja ha Ñandejára rape. Amo hu’ãme ñasẽta mba’evépe.

Pa’i Jasy.