Ñahendu Jesús Ñe’ẽ. Sábado 22º Durante el Año

Escucha el evangelio y la reflexión en: https://youtu.be/0Y-n9DIL4p8

Sábado 22º Durante el Año San Lucas 6, 1 – 5

Peteĩ pytu’uha ára jave, Jesús ha idisípulokuéra ohasa ohóvo peteĩ trigoty rupi. Idisípulokuéra oipo’o ohóvo hi’a, ojykýi ipópe ha ho’u.

Umi fariséo he’i chupekuéra:— Pejapo’ỹ va’erã pejapo hína. Pytu’uha árape niko péicha ndajajapóiva.

Jesús katu he’i chupekuéra: — Peikuaa porã niko mba’épa he’i Ñandejára ñe’ẽme ku David ha iñirũ nguéra iñembyahýi ramo guare. Oike va’ekue hikuái Tupaópe ha ho’u umi pan Ñandejárape oñemboyke va’ekue.

Umíva umi pan niko pa’ikuérape guarã añónte vaekue. Che pópe oĩ hína ha’évo mba’e-mba’épa ikatu jajapo pytu’uha árape.

Ñandejára Jesucristo Ñe’ẽ.

ÑAMBOGUEJYMI ÑANDE REKOVÉPE

Ñanemandu’ámi ñahendúramo peteĩ ambulancia hyapúva oúvo tapére. Ajépa ñande japyta jajesareko ha ñama’ẽ porã opa hendáguio ani ágã ohasa ñande ári mba’e upe mba’yru. Ambulancia peguarã niko ndaipóri semáforo pytã, ndaipóri jeiko mbegue, ndaipóri contramano, ndaipóri policía ojoko vaerã ichupe. Tohasáke ha toguahẽkepe oho ha’e opena’ỹre umi tránsito rehegua léire.

Ha mba’érepa upéva. Ha ojehecha niko ñeikotevẽme. Oraha niko hína hasyetéva. Ha umi jejopy vaípe oĩva peguarã niko ojepe’ápa umi léi hesãiva peguarã ovaléva, ikatu haguãicha ojesalva pe tapicha rekove. Upe léi tuichavéva niko upe ñande rekove.

Ha léi kuéra niko hekoitépe oĩ haguã oĩ vaerã ñanepytyvõ haguã ha ndaha’éi oĩ va’erã ñande ári ñande jopy haguã ha ñande reko asy. Upéi léi niko ha’e peteĩ tembiporu ñane pytyvõ vaerãva jaiko porãve haguã tekojojápe oñondive.

Heta vése niko jahecha upe léi ojeporu vai ha ojeity umi ikangyvéva árinte. He’i háicha ñe’ẽ: “Mboriahu akã árinte ho’a rayo”. Ha jahecha sapy’a umi imbareteve ha iplatavévape guarã katu ndaipóriha léi ojokóva chupekuéra. Jahecha ha jaikuaa porãramo jepe ha’ekuéra hembiapo vaíha ha ndojapóiha upe léi he’i háicha, ha oipokãnte upe léi he’íva osẽ haguã mba’evérõ guaicha.

Jesús niko omomba’e upe Ñandejára léi ha ohayhu upe ñanembo’éva. Ha’e he’i ñandéve tekotevẽha opavave ñañeha’ã jajapo, ha ñañeha’ã va’erãha avei jajapo hekópe umi léi he’íva. Taha’e constitución, ha opaichagua léi oñemoĩva ñane retãme ha ñande ciudad pe.

Opáichavo Jesús ñanembo’e avei umi léi ñane pytyvõ vaerãha ha noñemoirĩ ñane apytĩ ha ñande reko asy haguã. Noñemoĩri va’erãha ikangýva ha oikotevẽva apére léi ombopy’aropúva ichupe. Umíchagua léigui tekotevẽ jajetyvyro ha jaheka toñemohenda ñanepytyvõ haguãicha añete. Mba’épa reñandu.

Pa’i Jasy.