Ñahendu Hesu. Tupãsy sánto ára

Escucha el evangelio y la reflexión en:

8 setiembre: Tupãsy sánto ára

Mateo 1, 18-23

Jesucristo oúramo guare kóicha vaekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijoheipyréva, nomoherakuã vaiséi chupe.

Oheja reise mo’ãnte chupe, avave oikuaa’ỹre. Ko’ã mba’e ombojere aja iñakãme, ojehechauka chupe iképe Ñandejára Ánhel, ha he’i chupe: José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou.

María imembýta ha rembohérata pe mitã Jesús. Ha’e ou hína osalva haguã tetã Israel.

Ko’ã mba’e ojehu oiko haguã hekoitépe upe Ñandejára he’iva’ekue proféta ñe’ ẽ rupi: “Kuñataĩ imarã’ỹva hye guasúta ha imemby kuimba’éta. Oñembohérata Emanuel, (he’iséva “Tupã oime ñane ndive”).”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Upe ñande sy ningo tuicha mba’e, ajépa. Ha isánto ára guahẽ ramo niko jajapo mante vaerã oime raẽva mba’e jaguerovy’ávo, ha opavave imemby jaguerohory ñande katumi háicha.

Ndajahejáiva ningo ohasa rei ñande hegui, jaháva hendápe ha ñatupãnói, jajere hese ha ñañeñanduka ichupe, jaraha jopói imi ha ñaime hendive. Jaikuaa ningo ndaha’éiha voi upe jaraháva upe ñande sy omomba’éva, ha’e niko ovy’áma ñambojeremi haguérente. Tuicha mba’e upe ñande sy, he’i háicha purahéi: “hekoviáko ndaikatúiva mamovénte jajuhu”.

Ha Hesu niko oreko avei isy. María, heñói vaekue itúva, karai Joaquín ha, isy, kuñakarai Ana héravagui, itáva Nasarépe, oĩva amo Galiléa vállepe, Israel retãyguáva.

María ohecha rire ára resa, imitã guive okakuaa upérupi Nasarépe, okakuaa háicha heta
mitakuña kampesína oikóva ñane retãme. Noñembo’éi vaekue kuñáme olee haguã ha
ndaikatúi oike ha oñe’ẽ umi itupao atýpe, oñembo tapykue vaekue heta mba’épe.

Ñandejára katu oiporavo Maríape, ha ombojegua ichupe isy ryepýpe heñói guive, oiko haguã ichugui peteĩ kuña johéi pyre ha imba’e porãva, ikatu va’erãva omboguapy ijehe Ñandejára ñe’ẽ ha omongakuaa ipy’ápe Hesúpe.

Jaguerohory aipóramo ñande avei María Hesu sýpe, ha’égui avei ñande sy marangatu.
Ñatupanóimi ichupe ha ñanemandu’a hese ko árape ha’e osẽ hague arapýpe.

Ñañembo’emi ichupe ha jajerure toma’ẽ ñande rehe ha’éva avei imemby. Jajerure ñande
sy kuérare, umi hye guasúva rehe, mitãmi ñande rogaguáre ha jajerure ko árape opaite
mitãkuña’i kuéra rehe. Ñadefende ha ñanerakate’yve haguã hekovére.

Pa’i Jasy.