Ñahendu Jesús Ñe’ẽ. Miércoles 23º Durante el Año

Escucha el evangelio y la reflexión en: https://youtu.be/O7jkunevL8A

 Miércoles 23º Durante el Año

Lucas 6, 20 – 26

Upérõ Jesús oma’ẽ porã idisípulokuérare ha he’i chupekuéra: – Pevy’a vaerã peẽ pene mboriahúva, pene mba’erã niko Ñandejára Réino.   Pevy’a va’erã peẽ ko’ágã pene ñembyahýiva, peẽme hembypáne pe’u vaerã. Pevy’a va’erã peẽ ko’ágã pene rasẽva, upéi vy’apópe peikóne.

 Ñandejára pende rovasa vaerã ágã oimérõ pende rehe nda’ija’éiva, pene mosẽva, pende ja’óva ha ojeguarúva pendehegui pejapógui che ha’éva peẽme.   Péicha voi pende rukuéra ypykue ojapo vaekue profétakuérare. Ágã péicha ojehu vove peẽme, tuicha pevy’a aipórõ, ha ta penerenyhẽ torýgui. Peẽme niko oñeme’ẽta hína jopói nde tuicháva yvágape.

   Peẽ pene mba’e retáva katu pejererekóke, cháke hetáma peiko porã.   Pejererekóke peẽ ko’ágã pene ryvãtãva, cháke tuicha pene ñembyahýi vaerã ágã. Pejererekóke peẽ ko’ágã pepukáva, cháke pene rasẽ ha pejahe’óne ñembyasýgui.

  Pejererekóke peẽ maymáva pende rerohory ramo. Pende rukuéra ypykue niko yma péicha avei ojapo vaekue proféta japukuérare.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

            Mboriahu ha jehasa asýgui niko ñakañy ha ñañeha’ã jajehekýi ha ñañemomombyry. Mba’e reta ha jeiko porãre katu opavave ojepokã ha hi’ãite péicha jaiko opa araite.

Ha ñahendu angete Hesu omomorã ha ohecha ramo umi imboriahúvape, umi ndorekóigui mamópa ojekóta ha ojehekáta, ojeroviáva Ñandejárare añoite.

Umíva ovy’a va’erã jepe ohasa asy ramo.  Ha he’ive Jesús, ovy’a vaerã umi tapicha Ñandejára ha ipehengue rayhupápe ohekáva tekojoja, ha oikóva oñeha’ã oikotevẽva rehe, ho’a ramo hi’ári ñe’ẽ vai, jejahéi, jeja’o ha oñemuñáramo upéicha oiko haguére. Tuicha oñemyengoviáta chupekuéra Ñandejára Rréino pe, he’i Jesús.

Ha tojererekóke umi imba’e retáva, hakate’ỹva ha nomboja’óiva, umi vy’a saingópe oikóva tuicha ofarrea, okaru guasu ha omokõ, ndoikauaaséiva hapicha remikotevẽ. Umíva ári ho’áta pytũ oimo’ã’ỹve hágui.

Natekotevẽiete niko opavave oñe’ẽ porã ñande rehe he’i Hesu. Upe tekotevẽva niko jajapo upe Ñandejára oipotáva. Ha he’ive avei  ñandéve: Pejepy’apýke opavave oñe’ẽ porãramo pende rehe, aníke peke aguara pire ári, he’i. Cháke upéicha oiko vaekue umi ijapu ha hova mokõiva rehe, oiko porãséva Ñandejára ha añándive. Okirirĩ ha ombohasáva umi poguasu rembiapo vaikue ani haguã ombopochy.

Ha’ete ku Jesús ombojeréva ipy gotyo pe ñande ñapensáva ha ñañandúva. Ajépa  che irũ ha che reindy. Heta gueteri vaicha ofalta ñandéve japilla haguã jahávo pe Ñandejára Rréino arandu rape, ndaha’éiva ko múndo mba’ekuaa ñanembo’e háicha.

Pa’i Jasy.