Ñahendu Jesús Ñe’ẽ. Lunes 3º Adviento

Escucha el evangelio y la reflexión en: https://youtu.be/YbvLEcNIC-o

Lunes 3° de Adviento                                     

                                   Mateo 21, 23-27.

Upérõ Jesús oike tupaópe ha ombo’e jave hína, og̃uahẽ hendápe pa’i ruvicha ha poguasu kuéra hudío kuéra apytépe. Oporandu chupe hikuái: — Mba’éicha rupi ejapo ko’ã mba’e. Mávaiko ome’ẽ ndéve reju hag̃ua rejapo umi mba’e rejapóva.

Jesús he’i chupekuéra: — Che ave aporandúta peẽme peteĩ mba’e. Ha peje kuaa ramo chéve, amombe’úta peẽme mba’éicha rupípa ija chéve ajapo hag̃ua umi mba’e ajapóva. Peje chéve, máva piko ome’ẽ raka’e Juánpe pu’aka oporomongarai hag̃ua. Ñandejára va’ekuéiko térã yvypórante.

Ha oñepyrũ oñe’ẽ hikuái oñondive, ha he’i, “Ág̃a ja’érõ Ñandejára ombou hague chupe, he’íta ñandéve, ‘Mba’ére ndaperoviái ra’e chupe’. Ha ja’érõ yvypóra hague katu, opu’ãta ñande rehe opavave. Umi hénte kuérape g̃uarã niko Juan proféta vaekue.”

Osẽ he’i hikuái Jesúspe: — Ndoroikuaái.

Upépe Jesús he’i chupekuéra: — Péicharõ, che avei namombe’u mo’ãi peẽme máva rupípa ajapo ko’ã mba’e.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Jesús oho ombo’e tupaópe ndaha’éiramo jepe pa’ikuéra rehegua. Upévare ou hikuái oporandu mávapa ombou ichupe, máva rupi ou ombo’e tupaópe.

Umi omyakãva tupao Jerusalén niko oñembojára tupaóre ha Tupã ñe’ẽre. Oimo’ã hikuái ha’e kuérante gua’u ikatu ombo’e upépe ha ndohejái hapichápe ohenduka iñe’ẽ. 

Jesús oporandu avei ichupe kuéra Juan Bautísta pa Tupã rembijokuái térã yvy arigua rembiapónte ojapo raka’e. Umi pa’i kuéra noñemoĩ vaiséi umi hénte kuéra renondépe, okirirĩnte ha oñembotavy. Okyhyjeve hikuái hénte kuéra ñe’ẽgui. Ha upémaramo Jesús avei oñembotavy ichugui kuéra ha nde’íri máva rupípa oporombo’e ha ojapo upe ojapóva.

            Jesús ndokyhyjéi ichugui kuéra ha nopenái avei hénte jurúre. Ha’e omotenonde Ñandejára rembipota. Ha’e ojapo upe Tupã oñandukáva ichupe ipy’ápe.

Umi pa’i ruvicha ha tupaoguakuérape ndogustáiramo iñe’ẽ ha hembiapo ha’e ndoguevíri upévare. Oho rei hese ha ohenduka iñe’ẽ ha hemiandu opavavépe, okañy’ỹre.

            Iporã ñande avei che irũ ha che reindy ñama’ẽmi mba’épa ñahenduve ha ñapenave. Jajapópa upe Ñandejára oñandukáva ñandéve ñande py’ápe, térãpa jakyhyje ha ñanemboguevi hénte juru. Ja’épa upe ñapensáva ha ñañandúva iporãve haguãicha opavave rovake, taha’e jepe ra’e pa’i, obispo térã mburuvicha kuéra renondépe.

Pa’i Jasy.