Ñahendu Jesús Ñe’ẽ. Lunes II de Cuaresma

Escucha el evangelio y la reflexión en: https://youtu.be/jK8S0cq5AQo

Lunes 2º Cuaresma

Lucas 6, 36 – 38

Upérõ Jesús he’i: Peiporiahuvereko va’erã opavavépe, pende Ru pende poriahuverekoháicha peẽme. Ani pemoĩ vai pende rapichápe, ndapeipotáirõ Ñandejára pene moĩ vai peẽme.

Ani pejopy vai pende rapichápe, ndapeipotáirõ Ñandejára pende jopy vai peẽme. Peheja rei hembiapo vaikue pende rapichápe, ha Ñandejára oheja reíne peẽme pene rembiapo vaikue. Oikotevẽvape peme’ẽ, ha Ñandejára ome’ẽne peẽme peikotevẽva. Ipojeráne pene ndive ha ome’ẽne peẽme pende vosa renyhẽ chovi.

Peẽ pejapoháicha pende rapicháre, upéicha Ñandejára omyengovia jeýne peẽme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande jajapo ramo ivaíva niko ñambohasánte ha ñarokirirĩ, ñañembotavy ha ñamokañy. Ágã katu ñande rapicha ojavy’imi ramo pya’e jahecha, ja’éma voi katu chupe mba’éichatapa upéicha ha mba’e. Mbyky voi jaja’o haguã mba’e ha ágãitéma ñamombe’u voi ambue ndohecháiva ha ndoikuaáivape ñamoĩ vai haguã chupe.

Oiko jepi avei tálla, jepuka ha ñembohory ñande rapicha ojavývare. Sapy’ánte ipohýimi umi ñe’ẽ ha ombopochy ñande rapichápe. Ha upépe katu ojepichãro lo mitã ojeityvéntema hi’ári. Ñande jajejopy vaíramo jaipota opavave ohechakuaa ñandéve ha ñane pytyvõ, tombohasa ipo ñasẽ haguã ivaívagui.

Jajavy ramo jaipota ñande rapicha ohecháva ha oikuaáva oheja rei ñandéve. Ani omombe’u, ani ñanemotĩ, tombovevúi ñandéve. Ani ñande jopy.

Jajerure ramo ñaikotevẽva ha jaipotáva niko ndaha’e mo’ãi ikatúgui ñande jehegui jareko térã jajapo. Ndaikatúiguintema voi niko jaha jajerure, jajejopýguinte niko jaha ñañemoĩ ñande rapicha renondépe tupã mba’e járaicha. Ha ijetu’uko hina pe jajerure asy ha noñeme’ẽi ñandéve, hasyve jahecha ramo nome’ẽséiguinte nome’ẽiha.

Oime ramo nde che irü ha che reindy, oñemyengoviataha ñandéve pe ñande jajapo ha ñame’ẽ háicha niko iporã epensami mba’épepa reiporiahuverekove va’erã nde rapichápe, eheja rei hembiapo vaikue, ani ejopy eterei ha emoĩvai ojavývape.

Upéicha ndéve avei Ñandejára ndeporiahuverekóta, nandejopy mo’ãi ha nandemoi vai mo’ãi. Ha eme’ẽ ramo ojerurévape Tupã avei ome’ẽ renyhẽta ndéve, ombochovíta ha orrevosáta
nde vosa.

Pa’i Alberto Luna.