Ñahendu Jesús Ñe’ẽ. Domingo II de Cuaresma

Escucha el evangelio y la reflexión en: https://youtu.be/l0h3G3_WRoU?feature=shared

Domingo 2º Cuaresma Ciclo C                                                        Lucas 9, 28 – 36.

   Uperõ Jesús ogueraha Pedro, Santiago ha Juánpe peteĩ sérro ru’ãme oñembo’e haguã.  Ha oñembo’e aja hína, Jesús rova iñambue ha ijao katu ojajái ha morotĩ sakã.  Ha peichaháguinte katu, ojekuaa sapy’a Moisés ha Elías oñomongetáva hína Jesús ndive,  ha pe ijere katu omimbipa. Ha oñe’ẽ hikuái Jesús ndive, ijeho rehe Jerusalénpe ojehekýi haguã upépe.

Ha hopehýi eterei ramo jepe, Pedro ha iñirũnguéra ndokéi. Ohecha hikuái mba’éichapa Jesús rete omimbipa ha umi mokõi oĩva hendive ave.

Moisés ha Elías ohótamavo, Pedro he’i Jesúspe: — Mbo’ehára, ajépa iporãite ikatúre roime ápe. Reipotárõ, na torojapo peẽme rrancho’imimi pene rendaguã. Peteĩ ne mba’erã, peteĩ Moiséspe guarã ha Elíaspe guarã avei.

Pedro katu he’ínte pe he’íva, ndoikuaáigui rei mba’épa he’íta.

Ha Pedro oñe’ẽ jave gueteri hína, ohasa sapy’a peteĩ arai omo’ãmbáva chupe kuéra. Tuicha oñemondýi hikuái.  Pe araígui katu oñehendu oñe’ẽva ha he’íva: “Kóva hína che Ra’y, che aiporavo vaekue. Pejapo upe ha’e he’íva peẽme.”

 Ohendupávo upe oñe’ẽvape, Pedro, Juan ha Santiago ohecha Jesús ha’eñóntema oĩha. Ha are oguerokirirĩ hikuái pe ohecha vaekue, omombe’u’ỹre avavépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Yvágare che pojái ha yvýre ajepokyty. He’i ningo peteĩ purahéi. Ha mba’étapa umi ikatúva añete ñande py’a rupi ñañandu peve ñande pojaiha yvágare. Oime niko ijuku’áva pláta rekávo, óga, ao, tembi’u porã oreko haguã, oime oiko hatãva omanda guasu haguã, oiméma katu ostudia pukúva hamba’e.  Yvágare vaicha ipojáita umíva reheve, ha ndohupytýi ramo katu yvýre ojepokyty ramo guáicha.

            Ko árape ñahendu Jesús oraháramo guare iñirũnguérape sérro yvate ru’ãme. Upépe jajupi haguã niko ijetu’u añete, nañaguahẽi péicha péichante. Pe sérro yvate niko ha’éta hína pe Ñandejára oĩháme. Ha jajupi ramo Jesús ndive pe sérro yvate niko ñañemoaiguĩve Ñandejáragui. Ha upépe oho raka’e Jesús oñembo’e ojajái peve hova ha hete. Ha ohendu Túva Ñandejára ñe’ẽ: Kóva ha’e che ra’y ahayhúva. Pehendu ichupe.

            Ndépa ekarkula che irũ ha che reindy eñembo’e ha ehendúvo Jesús ñe’ẽ ehupytýne haguã py’aguapy ha vy’apave ne ánga ruguápe. Ndaha’éi chénepa upéva hína pe sérro ru’ã, reñandu pypuku hápe nde ha’eha añetehápe Ñandejára ra’y, Ñandejára rajy, ha’e ohayhúva.

ÑAÑEMBO’E OÑONDIVE

Ñandejára Jesucristo, aníkena eheja rotyryry yvy apérente. Orerupi nendive ha eñanduka oréve Ñandejára mborayhu, orembarete ha rogueropu’aka haguã opa mba’e. Amén.

Pa’i Alberto Luna.