Ñahendu Jesús Ñe’ẽ. Domingo I de Cuaresma

Escucha el evangelio y la reflexión en: https://youtu.be/YzrfmHDN3uY

Domingo 1º Cuaresma Ciclo C Lucas 4, 1 – 13

Jesús oúvo río Jordángui, henyhẽ Espíritu Sántogui. Upéi katu pe Espíritu ogueraha chupe peteĩ desiértope. Upépe Aña oipy’a ra’ã chupe 40 ára pukukue, ha umíva umi árape ndo’úi mba’eve. Ohasa rire umi ára katu, oñandu iñembyahýi.

Upépe Aña he’i chupe: — Nde ramo añete Ñandejára ra’y, ere ko’ã itápe toiko chugui pan.

Jesús katu osẽ he’i chupe: — Ñandejára Ñe’ẽme niko he’i: “Ndaha’éiko pan añónte oikotevẽva yvypóra oikove haguã”.

Upéi, Aña ohupi chupe peteĩ sérro ru’ãme. Ha upépe peteĩ tesa pirĩme ohechaukapa chupe tetã oĩmíva yvy arigua. He’i Jesúspe: — Chéve niko ko’ãva oñeme’ẽmba va’ekue, ha ame’ẽ kuaa ame’ẽsévape. Ndéve ame’ẽta ne mba’erã, reñesũ ramo che renondépe ha che momba’e guasu.

Jesús katu he’i chupe: — Ñandejára Ñe’ẽme niko he’i: “Tupãme añónte emomba’e guasu, ha chupe añoite eñakaity va’erã”.

Upéi katu Aña ogueraha Jesúspe, Jerusalénpe. Ohupi chupe pe tupao ári, pe ijyvatevehápe. He’i chupe: — Nde ramo añete Ñandejára ra’y, eñemombo yvýpe.

Ñandejára Ñe’ẽme niko he’i: “Tupã he’íta hi’ángel kuérape oñangareko haguã nde rehe. Ijyva ári nde jokóta, ani haguã reñepysãnga”.

Jesús katu he’i chupe: — Ñandejára Ñe’ẽme niko he’i avei: “Ani mo’ãke reipy’a ra’ã Tupãme”. Aña ndojuhu véimarõ mba’éichapa oipy’a ra’ãvéta Jesúspe, oheja chupe upérõ, ágã ijávo ou jey haguã chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe Aña niko noñembojarúi ta’u nde ra’y Ñandejára ndive. Ndaipóri ñembojaru hendive. Pinda raimbe opoi ñande rovake. Tenonderã umi ñande rete ojeruréva: ñamboy’u, jajoka tye, jagosa. Vy’a saingo gua’u rupi omosã hetápe.

Upéi katu ñane ra’ã ñande rríko ha ñañemoĩse haguã ñande rapicha kuéra akã ári, upévape oity hetápe iñuhãme. Amo ipahápe katu opa Ñandejára ñe’ẽma ombojere ipy gotyo ñanembotavy haguã. Ipy ha ipópe ñane ra’ã ñanerundiete haguãicha. Ndaipóri jurujái hendive.

Jesús ndo’ái iñuhãme. Ndohejái voi Aña ombojuru he’ẽ chupe. Pya’e voi ombohovái iñe’ẽ japu. Opyta hatã Tupã ñe’ẽ he’ívape. Upégui nomýi. Ko Cuaresma pe che reindy ha nde che irũ ñanepytyvõta ñañembokatupyry imive ramo Ñandejára rapére.

Ñañembo’e imive, ñañembojave tupaóre. Ani jaheja ñande kupylia Aña tuja.

ÑAÑEMBO’E OÑONDIVE

Ñandejára Jesucristo, nderehejái va’ekue Aña nembotavy ha ipu’aka nde rehe. Ore pytyvõ míkena rojehekýi haguã ichugui ha roguata haguã nendive opa araite. Amén.

Pa’i Alberto Luna.