Ñahendu Jesús Ñe’ẽ. Viernes después de Ceniza

Escucha el evangelio y la reflexión en: https://youtu.be/t1byV11dEo0

Viernes Tanimbu ára rire Mateo 9, 14 – 15

Upérõ Juan Bautista disípulokuéra oñemboja Jesús rendápe. Ha oporandu chupe: — Umi fariséokuéra, ha ore ave niko, py’ỹi ro’ajuna. Nde disípulokuéra katu niko nahániri. Mba’éreiko péva.

Jesús he’i chupekuéra: — Omenda ramóva irũ nguéra niko noñembyasýi pe ména pyahu oĩ aja hendive kuéra. Nahániri. Oguãhẽne jepe ára ha’e ojepe’ávo ichuguikuéra. Upépe ágã o’ajunáne hikuái.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko he’íva umi ikarai guasu etereíva ykére ndajavy’ái. Ñakirirĩ guasu, ñande rovasy ha ndajaikuái mba’épa ja’éta. Ohoseve partido hápe, osapukái, ijayvu, opuka puku. Térã fiesta hápe mba’e. Musikapu, ñemongeta kyre’ỹme ojehe’a, ojeroky.

Juan Bautísta irũ nguéra ou Jesús rendápe ha he’i ha’e kuéra ha umi fariseo ojapoha ajúno, ha oikuaase mba’érepa Jesús ha idisípulokuéra ndojapói. Heta niko oime añete oimo’ãva ha he’íva voi pe tupaópe jahávo ñañembo’e Ñandejárape ndaikatuiha ñaime vy’a guasúperamo guáicha. Ndaikatúi ñande ayvu, ñamýi eterei, ñañe’ẽ hatã jepe. Ha’eteku ñañepomoĩ, ñañembo’e puku ha ñañesũvonte jaikoha.

Jesús he’i umi iñirũnguéra ndaha’éiha opa ára oñembyasýva oikóvo. Umi oguatáva hendive oĩha peteĩ fiésta, ñemendáperamo guáicha, he’i. Ovy’a ha horýva oñondive, opuka ha ojehe’áva, ojokuaáva ha oñemongetáva py’a porãme.

Ojoecha ramo ha okaru oñondivepa. Opáichavo Jesús he’i avei oguahẽta ára ha’e ojepe’ávo iñirũnguéra apytégui, ha upépe ohasa asytaha. Ha ajépa añete nde che reindy ha che irũ.

Pe ñande rekove niko ogueru voi ijehegui araka’épa ñañembyasýta. Opa mba’e itiémpo. Natekotevẽi ñande jaheka ha ñamoĩ ñande apére ita pohýi. Ou vove jehasa asy tiémpo ñamboguata py’aguapy ha jerovia pope ñande kurusu. Ha ou vove ñandéve jehasa porã, javy’a ñande rapicha ndive, ja’agradese Ñandejárape imba’e porãre ñanendive.

Pa’i Alberto Luna.