Ñahendu Jesús Ñe’ẽ. Lunes 8º Tiempo Durante el Año

Escucha el evangelio y la reflexión en: https://youtu.be/HQxWKpwf4jo

Lunes 8º Durante el Año Marcos 10, 17-27

Jesús oguata jave ohóvo hína, odipara ou hendápe peteĩ kuimba’e. Oñesũ henondépe ha oporandu chupe: — Mbo’ehára marangatu, mba’éiko ajapo vaerã ahupyty haguã jeikove opave’ỹva.

Jesús he’i chupe: — Mba’éreiko ere che rehe che marangatuha. Peteĩnte niko oĩ imarangatúva, ha upéva Ñandejára. Reikuaapa porã niko Ñandejára mandamiénto. “Ani reporojuka, ani reporomyakã ratĩ, ani remonda, ani eñe’ẽ rei nde rapicháre, ani nde japu, ha emomba’e nde ru ha nde sýpe.”

Pe kuimba’e he’i chupe: — Opa umíva niko ajapóva voínte che mitã guive.

Ha Jesús oma’ẽ porã hese. Ipy’aho hese. He’i chupe: — Peteĩ mba’énte rejapove va’erã.

Tereho evendepa opa erekóva ha hepykue eme’ẽ mboriahúpe. Péicharõ nde rríkota yvágape. Upe rire, eju che moirũ.

Upéva ohendúvo, tuicha oguapy pe karia’ýre. Ñembyasýpe osẽ oho, kuimba’e nde rríkova niko ha’e.

Jesús ojere he’i idisípulokuérape: — Ajépa hasy umi irríkovape oike haguã Ñandejára Réinope.

Upéva ohendúvo hikuái, idisípulokuéra oñemondyipa. Jesús katu he’i jey voi chupekuéra: — Hasýko hína jaike haguã Ñandejára Réinope. Péicha-péichante niko ndajaikéi.

Ndahasyive va’erã ñambohasa ju resa rupi kavaju, irríkova oike rangue Ñandejára Réinope. Upéva ohendúvo hikuái katu, ko’yteve opondera joa, ha he’i ojupe: — Péicharõ piko máva ojesalváta.

Jesús oma’ẽ hesekuéra, ha he’i: — Yvypórape ijeheguínte, ndaikatúi. Ñandejárape guarã katu ndaipóri mba’eve ikatu’ỹva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko he’íva: Che namondái, ndaporojukái, ndaka’úi, ndaikói añe’ẽ avavére, ndaiko vaíri che rapicha ndive, ndajapói mba’eve ivaíva… Upéicha nunga avei ko kuimba’e oúva Jesús rendápe. He’i ha’e ojapopaha Ñandejára mandamiento.

Jesús oñandu hese imba’e porãha añete, ha he’i chupe: ‘Peteĩ mba’énte ofalta ndéve. Eheja opa erekomíva ha eju chemoirũ, hetave mba’e porã jajapo haguã oñondive.’ Ojevalese hese Jesús, ja’e porãse ramo. Upépe katu oguevi ñande ra’y. Hatã oñemosã raka’e umi mba’eta orekóvagui. Ndohejaséi. Ha itĩndy ohóvo.

Mba’épa nde reñandu hína umi mba’e neapytĩ ha ndejokóva ha nderepoiséiva Ñandejára ojevale porãve haguã nde rehe, ha hetave mba’e porã rejapo haguã hendive.

Pa’i Alberto Luna.