Ñahendu Jesús Ñe’ẽ. Lunes Semana 20º Durante el Año

Escucha el evangelio y la reflexión en: https://youtu.be/FNNRvt4Mz-8

Lunes 20º Durante el Año

Mateo 19, 16 – 22.

Upérõ oguãhẽ Jesús rendápe peteĩ karia’y, ha oporandu chupe: — Mbo’ehára, mba’e iporãva piko ajapo vaerã ahupyty haguã jeikove opave’ỹva.

Jesús he’i chupe: — Mba’éicha rupi piko reporandu chéve mba’épa hína pe iporãva. Ñandejára rehe
añónte niko ikatu ja’e upéva. Ha reikovese ramo, ejapo Ñandejára mandamiénto he’íva.

Pe karia’y he’i chupe: — Mavaitévapa.

Ha Jesús he’i chupe: — Ani reporojuka, ani reporomyakã ratĩ, ani remonda, ani eñe’ẽ rei nde rapicháre,
emomba’e nde ru ha nde sýpe, ha ehayhu nde rapichápe rejehayhuháicha nde.

Pe karia’y he’i chupe: — Opa umíva niko ajapóva voínte. Mba’éiko ajapove va’erã.

Jesús he’i chupe: — Nde reko porãse ramo Ñandejára oipotaháicha, tereho evende opa erekóva ha eme’ẽ hepykue mboriahúpe. Péicharõ rerekóta mba’eta yvágape. Upéi, eju che moirũ.

Pe karia’y ohendúvo upéva, ñembyasýpe osẽ oho, kuimba’e nde rríkova niko ha’e ra’e.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Heta tapicha imba’e porãva niko ñande jaikuaa, oime ñane irũnguéra apytépe oñeha’ãva omboguata porã hembiapo, hogapy, ha ndoikéiva tape karẽ rupi.

Ñande voi niko ikatu avei ja’e ñande jehe ñañeha’ãha jaikóvo jajapo haguã hekópe ñane rembiapo ha jaguata tape potĩre, jaike’ỹre monda, ñorairõ, ka’u, japúpe ha mba’e. Ñañeha’ã jaiko porã ñande vesíno kuéra ndive, ñamomba’e ñande ru ha ñande sy, nañamoakãratĩri ñande rogagua, nadajaporojukái ha nañañembosarái avavére. Péva ñañeha’ãramo jajapo niko ovale tereíma.

Ha ou ko kuimba’e umíva ojapopáva voínte avei ha oporandu Jesúspe mba’épa ojapove va’erã. Ha Jesús niko oiméne oñandu hese imba’e porã háguima voi oipotaveha, ombopypukuseve hekove ha ijerovia, ha upémaramo okonvida ichupe ou haguã hendive ha oiko haguã ha’e oiko háichaite, oiko haguã idisípulo térã apóstolkuéraicha. Ha upépe ñande sósio ipytaryrýi ha ogueviete voi.

Oiméne ko noha’arõi ete péicha outaha Hesu oityvyro ichupe. Nimbo ra’e hetaiterei ohejata ra’e la ohóramo Hesu ndive. Irríko rasapa ndaje ra’e ha ombopo’iete voi.

Ha upéicha ko hína che irũ ha che reindy, Ñandejára ñanerenói ramo jepe nañande obligái. Hesu niko oiporavo mávapepa ohenóita iñirũra oiko haguã ha’e oiko háichaite, ha mávapepa nahániri. Opavave ningo ñañeha’ã ñande rekovemíre.

Umi Hesu oiporavo ha ohenóivape apóstolrãicha katu ningo ojerure imive, opoi paite haguã ijehegui Ñandejára pópe, oñemosã’ỹre mba’éveichagua mba’ére.

Pa’i Jasy.