Ñahendu Jesús Ñe’ẽ. Domingo Semana 20º TO

Escucha el evangelio y la reflexión en: https://youtu.be/l1EEn-W0FRg

Domingo 20 a TO Ciclo A

Mateo 15, 21 – 28.

Upéramo Jesús osẽ Genesarétgui ha oho oiko Tíro ha Sidón jerére. Ha peteĩ kuña
Canaangua upe rupi oikóva, oñemboja Jesús rendápe. Osapukái hápe he’i:

—Karai, ndéko hína ku Mesías. Che poriahuverekóna. Che membykuña niko oĩ demóño
poguýpe, ha oguereko vai eterei chupe.

Jesús katu nopenái hese. Upémarõ idisípulo kuéra oñemboja hendápe, ha he’i chupe:
—Ehechána mba’épa oipota pe kuña. Osapukái niko oúvo ñande rapykuéri.

Upépe Jesús he’i chupekuéra:
—Tupã niko che mbou Israelguápente. Umíva niko ku ovecha herekua’ỹvaicha oiko.

Upe jave katu pe kuña og̃uahẽ ha oñesũ Jesús renondépe, ha he’i chupe:
—Karai, che pytyvõna.

Jesús he’i chupe:
—Na’iporãi niko jaipe’a mitã jurúgui tembi’u ha ñame’ẽ jaguápe.

Pe kuña katu he’i chupe:
—Añete niko pe eréva. Péicharõ jepe, jaguánte avei niko ho’u pe tembi’u rembyre ho’áva
ijára meságui.

Upémarõ Jesús he’i chupe:
—Tuichaite piko rejerovia che rehe. Pévare, toiko ndéve pe rejeruréva.
Upévo okuera imemby kuña.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Peteĩ jagua oikéramo ndaha’eihápe hóga jere niko oĩ háicha umi jagua oñepyrũ
oñarõ, oñemohãimbiti chupe ha omuña omosẽ peve. Jahecháko omoingéva huguái hetyma kuápe ha okañy upégui. Ñande avei umi ndaha’éiva ñande rehegua ndive, ñama’ẽ sa’yke, ndajaguerohory guasúi voi ha ndajajehe’ái.

Ñahendu peteĩ kuña ndaha’éiva pe rreligión Israelgua ou Hesu rendápe ha ojerure
oipohano haguã imemby kuñame. Umi apóstolkuéra he’íma voi hese noĩporãiha
osapukáigui oúvo.

Ko kuña py’a guasu katu nopenái. Oho Hesu rendápe. Ha ñanembo’e ndajaguevíri
va’erãha, Ñandejára renondépe jepe jasapukái haguã jajerurévo pe hekopeguáva. Ha Jesús ave ohechakuaa nañanefanatiko va’erãiha ra’e.

Ndaha’éiko ñande católico terã evangélico añónte umi Jesús ohovasáva. Ñandejára grásia ndopytái ore kuetépe guarã, ñande tupao, ñande rreligión, ñande grupo, térã ñande kapílla korapýpe. Ñandejára oime opavave ojeruréva, ohekáva ha ojeroviáva peguarã hese.

ÑAÑEMBO’E OÑONDIVE

Ñandejára Hesukrísto rehendúva opavave oikotevẽva ha ojerurévape. Emohu’ũ kena ore
korasõ ani haguã romboty ore rokẽ ore rapicha oime asývape, ndaha’éi haguére ore
rehegua. Amén.

Pa’i Jasy