Ñahendu Hesu: Tupãsy ojehupi yvágape

Escucha el evangelio y la reflexión en: https://youtu.be/qKHDuoXKGPg

15 de agosto: Tupãsy ojehupi yvágape.

Lucas 1, 39 – 56.

Umíva umi árape, pya’ete María osẽ oho peteĩ puéblope opytáva sérro pa’ũme Judápe.
Oikévo Zacarías rógape, omomaitei Isabélpe. Ha ohendúvo María maitei, Isabel
oñandu mba’éichapa pe mitã omýi hyépe.

Upépe, Isabel henyhẽ Espíritu Sántogui. Ha
osẽ he’i Maríape: — Ñandejára niko nde rovasave ndéve opa kuña apytégui. Ha ohovasa
ne memby ave. Máva piko che, nde Ñandejára sy, reju haguã che rendápe. Ahendúvo
nde che momaiteívo, che memby omýi vy’águi che ryépe. Ñandejára nde rovasa rerovia
haguére oikotaha umi mba’e ha’e he’i va’ekue ndéve.

Ha María he’i: — Che py’aite guive amomba’eguasu Ñandejárape. Che ánga rugua
guive aguerohory Tupã, che salvadórpe. Ñandejára omoĩ hesa che rehe, che niko
hembiguaimínte.

Águi rire opavave he’íne chéve: «María, Ñandejára nde rovasa». Ñandejára
Ipu’akapáva niko mba’e guasuete ojapo che pype. Ha’e niko imarangatu.
Ñandejára oiporiahuvereko opa ára umi chupe omomba’e guasúvape. Ha ipyapy
mbarete rupive ohundi umi ojejapóvape. Poguasúpe oity iguapyhágui ha heko mirĩvape
katu ohupi. Umi iñembyahýivape omyenyhẽ mba’e porãgui, ha po nandi orrepunta umi
imba’e retávape.

Oipytyvõ hetã Israélpe. Oiporiahuvereko chupe ha ndahesaráiri chugui. Péicha voi
he’i vaekue ojapotaha ñande ru kuéra ypykuépe, Abraham ha iñemoñarépe.
María opyta oiko Isabel ndive mbohapy mése rupi. Upéi katu oho jey hógape.
Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta táva ko ñane retãme niko oñembohéra Tupãsy María rayhupápe: Asunción,
Concepción, Encarnación, Rosario ha mba’e. Ko árape ñaromandu’a hína Táva
Paraguay, oñembohérava Asunción, oñepyrũ ramo guare Tupãsy ñande sy Asunción
árape. 15 agosto 1537 ára ko’ẽme oñemopyenda raka’e Paraguay, ñande rrío guasu
rembe’ýpe.

Pe Tupãsy Asunción ñaromandu’áva ñaína niko ha’e upe ára ñande sy María
omohu’ã ramo guare iguata ko yvy ári, ha ojehupi ramo guare yvágape Tupã Ñandejára
pu’aka rupive. Upépe oĩ haguã Túva Ñandejára, imemby Hesu, ha Espíritu Santo ndive,
vy’a apyra’ỹme, opavave santo kuéra ndive, oma’ ẽvo ñande rehe upe guive, ñande
rovasa ha ñane ra’arõvo.

Ñahendu kuri María ohóva pya’ete oñandu Isabélpe, ipríma hye guasuetéva Juan Bautístagui, ha Tupãsy katu oraha ipype Hesúpe. Ha oñuguaitĩvo hikuái, ndaje raka’e,
Juan Bautista opo voi isy ryépe oñandúvo ouha María ha ipype Hesu. Isabel ma katu
ohecháramo ha omoñe’ẽmba Maríape. He’i ha’eha Ñandejára sy, kuña oguerovia hatãva
oikotaha opa mba’e Ñandejára he’i va’ekue.

Ñande avei che reindy ha nde che irũ, jaguerohory ñande sy. Kuña johei pyre marangatu, iñe’é rendúva Ñandejárape ha omoirũ va’ekue imemby Hesúpe oñepyrũ guive opaite peve hekove. Ha opyta vaekue oguata haguã pe Iglesia ñepyrũmbýpe apóstolkuéra ha opavave cristianokuéra ykére imemby rayhupápe.

Pa’i Jasy.