Ñahendu Jesús Ñe’ẽ. Domingo 33° Durante el Año
19 noviembre, 2023Ñahendu Hesu Ñe’ê. Tupãsy Presentación tupaópe
20 noviembre, 2023
Escucha el evangelio y la reflexión en: https://youtu.be/29idEvMI2zI?si=3hbqMXMt41c7xCX2
Lunes 33ª TO
Lucas 18, 35 – 43
Jesús og̃uahẽvo ohóvo Jericópe, tape yképe oguapy hína peteĩ ohecha’ỹva ha ojeruréva ho’u va’erã. Ha ohendúvo hetaha umi ohasáva ohóvo tapére, oporandu mba’épa ojehu.
Ha he’i chupe hikuái Jesús ohasaha ohóvo hína. Upépe ha’e oñemoĩ osapukái:
— Jesús, David ra’y, che poriahurerekomína.
Umi tenonde ohóva hína katu osẽ he’i chupe: — Nápy ekirirĩ.
Upépe katu hatãvéntema oñemoĩ osapukái: — David ra’y, che poriahurerekomína. Upévo, Jesús opyta, ha he’i ojereru hag̃ua chupe pe ohecha’ỹvape.
Ha oñembojávo hendápe, Jesús oporandu chupe: — Mba’éiko reipota ajapo nde rehe.
Upe ohecha’ỹva osẽ he’i: — Mbo’ehára, ahechasemínteko.
Jesús he’i chupe: — Ema’ẽ upéicharõ ha ehecha jey. Che rehe rejerovia haguére rekuera.
Ha upepete pe ohecha’ỹva ohecha jey, ha oguerohory Ñandejárape Jesús rapykuéri. Ha opa umi ohecha va’ekue mba’épa ojehu, oguerohory avei Ñandejárape.
Ñandejára Hesukrísto ñe’ẽ.
ÑAMBOGUEJY ÑANDE REKOVÉPE…
Jahecha jepi ningo ñande rapicha ojeruréva kállere. Osẽva ñandéve, oguapýva tape yképe, ojupíva colectívope, opurahéiva, oĩ avei oúva ñande rógape ombota ñane rokẽ ha ojerure. Sapy’ánte ko ñande jajere chuguikuéra, ñañembotavy.
Sapy’ánte ñame’ẽ peteĩme, ha sapy’ánte ndajarekói, térã katu nañame’ẽsevéima ndajaikuaáigui mba’éichaguápa. Oĩ voi omosẽva ha oĩ avei oja’óva chupekuéra.
Ko tapicha ohecha’ỹva osapukái haguéicha, oĩ avei oñembyatýva oikotevẽgui ha osapukái oñehenduka haguã, noñepenáigui hesekuéra. Manifestación ojapóva, ojerure yvy, óga, “sin tierra”, “sin techo” oñembohérava. Oĩ campesino ha oĩ indígena, oĩ ñande rapicha oikóva Bañádo hárupi ha mba’e. Oĩ obrero kuéra. Umíva sapy’ánte oñepena hesekuéra ha heta vése katu oñemuña, oñenupã, ha ojereraha préso ha mba’e, oñemokirirĩ haguã.
Hesu ohenói pe tapicha ojerurévape, oñemombova hína pe tape yképe. Oheja oñemboja hese, oñemongeta hendive, ohendu chupe, oikuaase mba’épa ojehu chupe.
Oporandu mba’etépa pe oipotáva ha oikotevẽva. Hesu ñanembo’e, che irũ ha che reindy, ñahendu vaerãha ñande rapicha remikotevẽ.
“Rejerovia rupi rekuera”. He’i chupe Hesu. Aipóramo pe pohã oiméma voi ipy’ápe ra’e. Ojerovia mbarete ohupytytaha Hesúgui pe oikotevẽva, ha oho hese, ha ndoguevíri okonsegi peve.
Ñamokyre’ỹ ñande rapicha oikotevẽvape. Tojerovia ohupytýtaha upe ohekáva, toñeha’ã ha ani ikane’õ, toñeñanduka oñemokirirĩséramo jepe. Ñande ñamoirũnte va’erã chupekuéra ohekávo upe oikotevẽva, ha’éva iderecho.
Pa’i Jasy.