Ñahendu Jesús Ñe’ẽ. Domingo 33° Durante el Año

Escucha el evangelio y la reflexión en: https://youtu.be/l1tlBYWZmOQ

Domingo 33ª TO Ciclo B Mateo 25, 14 – 30

Upérõ Jesús he’i: Ñandejára Reino niko kóichata hína. Oiko vaekue ndaje raka’e peteĩ karai ohótava mombyry. Ohenói mbohapy hembiguáipe ha oheja chupekuéra pláta omomemby haguã chupe.

Ha oikuaágui mbohapyvépe, pe iñakã porãvévape oheja hetave ha umi ambuépe katu michĩve. Tenondeguápe oheja 5 vosa pláta, pe ambuépe mokõi vosa, pe tapykueguápe katu peteĩnte.

Upéi osẽ oho. Upe 5 vosa ohupyty va’ekue, oho omomba’apo, ha omomemby jey 5 vosa. Upe mokõi ohupyty vaekue oho avei omomba’apo, ha omomemby jey mokõi vosa. Upe peteĩ vosánte ohupyty va’ekue katu, oho oñotỹ.

Are rire, ou jey pe karai ha oikuaase mba’épa ojapo ra’e hikuái pe pláta oheja va’ekue chupekuéragui.

Oñemboja hendápe pe 5 vosa ohupyty va’ekue. Ha he’i pe karaípe, “Che ruvicha, 5 vosa niko reheja va’ekue chéve, kóina ápe hi’ári 5 vosave, amomemby va’ekue ndéve.” Pe karai he’i chupe, “Iporã. Kuimba’e katupyry ha jeroviaháva niko nde ra’e. Resẽ porã haguére pe pláta michĩmi aheja va’ekue ndéve reheve, ko’águi rire hetaiteve amoĩta nde
pópe. Eike che rógape ha javy’a.”

Upéi ou pe kuimba’e ohupyty va’ekue mokõi vosa pláta. Ha’e avei he’i pe karaípe, “Che ruvicha, mokõi vosa niko reheja vaekue chéve, kóina ápe hi’ári mokõi vosave, amomemby va’ekue ndéve.” Pe karai he’i avei chupe, “Iporã.

Kuimba’e katupyry ha jeroviaháva niko nde ra’e. Resẽ porã haguére pe pláta michĩmi aheja va’ekue ndéve reheve, ko’águi rire hetaiteve amoĩta nde pópe. Eike che rógape ha javy’a.”

Ipahápe, oguãhẽ hendápe pe kuimba’e peteĩ vosánte oñeme’ẽ va’ekue chupe. Osẽ he’i pe karaípe, “Che ruvicha, aikuaa niko nde jopyha. Ha reme’ẽ’ỹ vaekue jepe rembyatyseha. Ha akyhyjégui ndehegui, aha añotỹ pe pláta reme’ẽ vaekue chéve. Kóina aguerupa jey ndéve.”

Pe karai osẽ he’i chupe, “Nde tekove ate’ỹ, mba’everã nderevaléiva. Reikuaárõ che jopyha, piko mba’ére nderehói ra’e eheja peteĩ omomba’apo vaerã pópe mba’e. Péicha aju jeývo, imemby va’erã mo’ã chéve michĩmínte jepe.” Ha he’i umi upépe oĩvape, “Peipe’a chugui pe vosa ha peme’ẽ pe 5 oguerekóvape.

Upe heta oguerekóvape, oñeme’ẽvéta ha hembypáta chupe. Upe oguereko’ỹvagui katu, pe michĩmi oguerekóva jepe ojepe’áta chugui. Ko tembiguái pituvápe katu, pemosẽ okápe pytũmbýpe. Upépe ojahe’o soróta ha hãi mante opururũta.”

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe ñande rekove niko tuicha mba’e. Óro ku’ígui tuichave. Peteĩ teĩme Ñandejára ome’ẽ imba’e porã ha oheja ñande pópe ñamongakuaa ha ñamoporãve haguã. Oiporukánte hína ñandéve, ágã ou peve ohecha mba’épa jajapo. Ha ñañandúramo ñande pila’ieterei na poloméno ñaipytyvõ umi omba’apo kyre’ỹvévape Ñandejára rayhupápe, ñande Iglésiape, amo ipahápe hemby haguãicha ñandéve guarã “interemi” jepe, amo yvága banco pe.

ÑAÑEMBO’E OÑONDIVE

Ñandejára, ne mba’e porãitégui ehejáva ore pópe opa mba’e, eme’ẽ oréve akã porã ha katupyry, romongakuaa haguã mborayhu ha jeiko porã opavavépe guarã. Amén.

Pa’i Jasy.