Ñahendu Hesu. Lunes VI Durante el Año

Escucha el evangelio y la reflexión en: https://youtu.be/RcrxTJmzJmc

Lunes 6. Durante el Año

Marcos 8, 11 – 13

Fariséokuéra oguãhẽ Jesús oĩháme, ha oñepyrũ oñoñe’ẽ api hikuái. Ha ombopakova
pireségui chupe hikuái, ojerure Jesúspe ojapo haguã chupe kuéra peteĩ milágro.

Péicharõ gua’úko oikuaáta hikuái Ñandejárapa ra’e pe omboúva Jesúspe. Jesús katu
ogueraha ipytu, ha ojere he’i: — Peẽ niko milágronte pejerure. Añete ha’e peẽme,
ndajapo mo’ãi peẽme mba’eveichagua milágro.

Ha Jesús osẽ oheja chupe kuéra. Ojupi kanóape ha ohasa lágo mboypýri.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko oĩ ojeroviáva Ñandejárare, ndaha’éiramo jepe católico. Oime heta religión ha heta tupao. Ñande ypykuéra guaraní jepe ha umi ambue indígenakuéra ñane retãme oiméva, España ou mboyve ymaite ogueru religión católica, orekóma voi raka’e hikuái itupã ha mba’éichapa oñembo’e chupe.

Ha péicha avei cristianokuéra apytépe, jajeroviáva Hesukrísto rehe ha jaiporúva Ñandejára ñe’ẽ, ñande Biblia, ñaime hetaichagua iglesia. Católico, evangélico, creyente oje’éva, bautísta, menonita, asamblea de Dios, oĩ ortodoxo, anglicano, luterano ha mba’e.

Opavave jajeroviáva Hesúre, jarekóva umi mba’e peteĩcha ñamomba’éva ha avei ñane ambuéva ojuehegui.

Ndaha’éi haguére peteĩchapa niko sapy’ánte ojeiko vai ha oñoñe’ẽ api oñondive ambue iglesia guáva. Evanhéllo oiko vai katólico ndive. Ojoja’o ha oñemombyry ojuehegui oheka rangue oñemopeteĩ, Hesu oipota haguéicha ñane peteĩ umi jajeroviáva hese.

Ko yvy tuichakue niko oĩ avei cristianokuéra javeve heta religión guasu. Oime judío kuéra, musulman kuéra, oime avei budista, oime hinduista. Ha hetave orekóva iñembo’e, itupao ha ikuatia omoñe’ẽva Tupãme.

Ñama’ẽ porãramo niko ndaikatúi Ñandejára rérape jaiko vai, ñañorairõ ha ñapu’ã oñuakãre. Ñandejára niko ñandejokuái ñañeha’ãvo jaiko py’aguapýpe, ñanembo’e ñande ha’eha peteĩcha, oñopehengue. Mba’éicha piko aipóramo opa jajojukáta hérape. Ñambojapu niko Ñandejárape péicha jaiko vaíramo.

Hesu ohecha ramo ouha umi fariséo hendápe omoĩvo pakova pire oity haguã chupe, jahecha mávapa imilagrove, mávapa oñe’ẽkuaave, mávapa ihénte hetave, ndoikéi pe tape po’ípe. Ojehejaite mandi voi chugui kuéra, ha osẽ oho upégui.

Ikatu avei ñande che reindy ha nde che irũ sapy’ánte jaiporu ñande religión ñande rapicha lómore jakopi haguã. Ñandejára rérape niko naiporãi jajoguerosapukái ha ñanetie’ỹ ojupe. Iporãve vaerã niko jaiporu rrespéto ñane ambuéramo jepe.

Ñañomongeta porã ha ñañeha’ã jaiko py’aguapýpe oñondive. Mba’épa nde reñandu.

Pa’i Alberto Luna.