Ñahendu Jesús. Martes 6º Tiempo Durante el Año

Escucha el evangelio y la reflexión en: https://youtu.be/JcoPJSrwPPQ

Martes 6º Durante el Año. Marcos 8, 14 – 21

Upérõ Jesús disípulo kuéra hesarái ra’e ogueraha haguã hi’upyrã. Pan peteĩ mínte oguereko hikuái pe kanóape.

Jesús he’i chupekuéra: — Peñeñangarekóke umi fariséo ha Herodes levadúragui.

Idisípulokuéra he’i ojupe: — Oime vaerãko péicha he’i ñandéve pan ndajaguerúi haguére.

Jesús katu oikuaapa mba’épa he’i hikuái. Ha osẽ he’i chupe kuéra: — Mba’éreiko peje ha peje ndapeguerúi hague pan. Ndapehechái gueteri piko. Ne’ĩra gueteri piko oike peẽme pene akãme. Pende resa, ha ndapehechái. Pende apysa, ha napehendúi. Na pene mandu’ái nga’u piko amboja’o hague 5 pan 5.000pe guarã. Mboy ajaka renyhẽ piko pembyaty raka’e upérõ umi hembyrégui.

Ha’ekuéra he’i: — 12.

He’i jey chupekuéra Jesús: — Ha piko na pene mandu’ái amboja’órõ guare umi 4.000 rupipe, 7 pan. Mboy ajaka pembyaty upérõ umi hembyrégui.

He’i hikuái: — 7.

Upépe he’i chupekuéra: — Ne’ĩra gueteri piko oike peẽme pene akãme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe añarã ningo ndahaéi katuete tuicha tyapúpe oñepyrũva. Péva ningo omba’apo ñande rehe ku levadúra omba’apo háicha pe pánpe. Michĩmínte tekotevẽ emoinge pype, ha upévante -háime ndojekuaáiramo jepe- ombovupaitéta hína pe mása tuicha háicha.

Térã katu pe kupi’i okaru háicha ñande róga horkón ha vígare. Kirirĩhapete okaru hese ha jahejáramo oho puku ágã ipahápe ndaikatu mo’ãvéima jajoko ha oitýta ñande róga ñane akã ári.

Jesús he’i iñirũ nguérape oñeñangareko haguã fariseo ha Herodes levadúragui. Ani oike ipype kuéra ohechakuaa’ỹre ha ombyaipa hekove. Herodes niko mburuvicha oiporúva pe mbarete orekóva ijupeguarãnte ha nomomba’éiva hapicha rekove jepe ojapo haguã oipotáva.

Jaikuaa niko ojukauka hague Juan Bautísta pe. Ha umi fariseo katu oñeha’ã ojapopaite Ñandejára léi ha oimo’ãma ha’ekuérante imba’e porã. Ha upévare ojeguaru hapicha hembiapo vaívagui. Mokõivéva niko amo ipahápe oapo’i hapichápe, oñemoĩ rangue ijykére jeguata jojápe.

Umíva oikéramo ñande py’ápe, ha jahechakuaa ramo ñañembovuha hína ñande rapicha renondépe, nañanepasiénsiai, ndajahechakuaái ñande rapicha ojavývape, ñande ja’évante la ovaléva, jahasapa ramo ñande rapicha akã ári jajapo haguã jajaposéva; cháke péva che irũ ha che reindy. Péva ha’éma hína pe kupi’i rape ojekuaáva ñande lómore hína. Ñañepohanóke oitypa mboyve ñande róga ñane akã ári.

Pa’i Alberto Luna.