Ñahendu Hesu. Miércoles 3º Adviento

Escucha el evangelio y la reflexión en: https://youtu.be/Mh7dDH8pawM

Miércoles 3° de Adviento

Lucas 7, 19 – 23

Upérõ Juan Bautista disípulokuéra omombe’u Juánpe umi mba’e Jesús ojapóva. Upémarõ, ohenói mokõime, ha omondo Jesús rendápe. Oho vaerã hikuái oporandu chupe ha’épa añete hína pe Mesías ou vaerãva, térãpa oha’arõve va’erã hikuái.

Juan Bautista disípulo oguãhẽ Jesús rendápe, ha he’i chupe: — Juan niko ore mbou ne rendápe roporandu haguã ndéve, ndépa hína pe Mesías, térãpa roha’arõve vaerã ambuépe.

Upe javete Jesús omonguera hína heta hasýva ha oiko asývape. Hetágui avei omosẽ demóño hamba’e, ha omonguera umi hecha’ỹvape.

Upéi katu ojere he’i chupekuéra:— Tapeho peje Juánpe mba’épa pehecha ha mba’épa pehendu. Peje chupe: ohecha’ỹva ohecha jeyha, paralítiko oguata porãha, lepróso okueraha, ohendu’ỹva ohendu jeyha, omanóva oikove jeyha ha imboriahúva ohenduha Ñandejára Rréino marandu porã. Ha Tupã ohovasa vaerã umi ohechávape ko’ã mba’e ajapóva, ha ndacherejái.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Ndaikuaái ojehúva chéve cheko’ẽnte sapy’a che ygue ygue rei imposible ndavy’ái”, he’i ningo Emiliano purahéi. Ha péicha avei sapy’a ikatu ñañandu ñande ha ñapensa: “Pévante piko la ñande rekove, noiméi piko ojajái ha iporãve va’erã raka’e. Ha upe ñañandúva
ñande rekovére ikatu avei ñañandu ñande rapicháre. Nañaha’arõi voi mba’e guasu osẽ umi ñandeichaguágui. Ni cinco nañame’ẽi ñande jeregua ha umi jaikuaa porãva rehe.

Upéva oiméne ombokuchu avei Juan Baustista akã ohechávo Hesúpe ha umi iñirũnguérape. Ha’e ningo oiméne oimo’ã raka’e Hesu, Tupã ra’y, outaha tuicha mimbipa reheve, hendy ha ojajaipátaha opavave renondépe. Ha ohechávo Hesu peteĩ ñandéicha guavanteha, oñepyrũma ipy’a mokõi ha oduda Hesu renondépe.

Omondóma katu idisípulokuéra oporandu haguã ichupete voi ha’épa hina upe Tupã remimbou añete térãpa oime ambue tuichavéva ou va’erãva ha’e rire.

Hesu nde’íri ichupekuéra mávapa ha’e. Nde’íri chéko la Mesia, chéko hína Tupã remimbou añeteguáva, nahániri. Hesu he’ínte omombe’u haguã Juan pe upe ha’ekuéra ohecháva ojapoha umi oiko asy, imboriahu ha oikotevẽvare. Mba’éichapa Hesu oñanduka opavavépe iñe’ẽ ha hembiapo rupive upe Ñandejára mborayhu ha Ñandejára pu’aka.

Aníkena ndave che reindy ha nde che irũ, upéicha ehechase katuete Ñandejára omboguejývo yvága ne renondépe ha nderehechakuaái imba’e porãiteha nendive, hetaite mba’e ome’ẽ va’ekue ndéve, ome’ẽva hína ndéve ko’ãgaite voi ha ome’ẽvéta gueteri. Ha mba’éichapa ojevale heta nde rapicha ndeichaguáva rehe nde rovasa haguã.

Pa’i Jasy.