Ñahendu Hesu. Martes 8ª Tiempo Durante el Año

Escucha el evangelio y la reflexión en: https://youtu.be/JHGlAItGbrI

Martes 8ª Semana Tiempo Durante el Año

Marcos 10, 28-31

Upérõ Pedro he’i Jesúspe: — Ore niko rohejapa opa mba’e ndéve romoirũ haguã.

Jesús he’i chupekuéra: — Añete ha’e peẽme, oĩ ramo ohejáva oimeraẽ mba’e che rehe ha Ñandejára marandu porã rehehápe, péva ohupytýta heta mba’e. Pe ohejáva hóga térã tyvýra, térã teindýra, túva, sy, hembireko, ita’ýra térã ijyvy, umi ohejáva rendaguépe oñembojo’áta chupe 100 óga, tyvýra, teindýra, sy, ta’ýra ha yvy.

Oikove aja voi oñeme’ẽta chupe opa umi mba’e. Umíva pa’ũ rupi jepe ohasa asýta avei. Omano rire katu, ohupytýta jeikove opa’ỹva. Ha heta umi ko’ágã itenondéva, itapykuéta. Ha heta umi ko’ágã itapykuéva, itenondéta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ikuénta piko jaiko iterei Ñandejára ha tupao rapykuéri, ñañeha’ã ñande rapicháre, jaiko ñembo’épe, mísa hápe, ñañembyaty comunidápe, ñamboguata catesímo, ñahendu Ñandejára ñe’ẽ umía. Mba’épa oheja ñandéve jaiko pa’i ha hermánakuéra ndive. Heta tapicha péicha oporandu…

Ha sapy’ánte ñande ñanekane’õ ave ha nosẽiramo ñandéve umi ñane rembiapo, ja’éma avei: Mba’éiko chénte aiko hatã itereíta, añeha’ã itereíta gua’u, ha ndojehechakuaái cheve. Tajeheja mba’éna…

Jahecha mitã San Pedro ou avei Hesu rendápe péicha he’i chupe: Mba’éiko ore rohupytýta. Ore rohejáva ore róga, ore rembireko, ore rembiapo, roju haguã nde rapykuéri. Mba’e piko roligáta…

Hesu he’i ani haguã ombyasy hapykuéri ohejáva. Toma’ẽ hetaha iñirũ pyahu, oñembyatýva, opavave omoguahẽha chupe kuéra hógape ha omongaruha chupekuéra ihénte ramo guáicha, hetápe oipytyvõ ha omoirũha. Ha Ñandejára nombofaltái ichupekuéra mba’eve, ohasa asy ramo jepe sapy’a.

Noguahẽipa ndéve che irũ ha ndéve che reindy, sapy’ánte avei repensa mba’erãpa reñeha’ã iterei, eñembotapykue, nerembiapo porã, ndahekovia mo’ãi ramo ndéve.

Upe jave avei ikatu nepytyvõ ko Hesu he’íva: Mba’evete ñamboykéva Ñandejára rérape ha jajeroviágui hese jajapóva ndopyta mo’ãi hekovia’ỹre, ko yvy árima voi. Ha upéi oñembojo’avéne ave ñandéve yvágape ñaguahẽvo. Ani ñambyasy aipo ramo umi mba’e jahejáva jajapo haguã iporãva Ñandejaŕa rérape.

Pa’i Alberto Luna.