Ñahendu Hesu. Pentecostés ára

Escucha el evangelio y la reflexión en: https://youtu.be/ELbQgJECotk

Pentecostés ára

Juan 20, 19-23

Upe árape voi, pe semána ñepyrũha ára pyharépe umi Jesús disípulo okyhyjégui hudíokuéra ruvichágui oñembyaty peteĩ koty ñembotypýpe. Ha upe Domíngo pyhare voi, Jesús ou sapy’a oñemoĩ mbytépe kuéra. Omomaitei chupe kuéra he’ívo: — Ta pende py’aguapy joaitéke.

Upéva he’ipávo, ohechauka chupe kuéra umi ipo ha pe ijyke ojekutu hague. Tuicha ovy’a
hikuái ohechávo Ñandejára Jesucrístope. Upéi katu Jesús omomaitei jey voi chupekuéra:— Py’aguapy toĩ pene ndive. Che Ru che mbou haguéicha, che pomondo peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ peperdonáva ipekádo, Ñandejára ave operdonáta chupe. Ha napeperdonái ramo katu,
Ñandejára ave noperdona mo’ãi chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ijespíritu’i, ipy’a mirĩ ñande rapicha”, he’i ningo lo mitã ohechávo pe máva okyhyje ha noñanimái opu’ã, oñe’ẽ, ha oñakãity opyta, ha itindýnte voi oikóvo.

Péva ndoho puku mo’ãi hína ha nomokyre’ỹ mo’ãi avavépe. Ha péicha nunga niko opyta kuri apóstolkuéra ha umi kuña omoirũ va’ekue Hesúpe ha’e omano rire. Ha oikove jevy rire jepe, noñakãrapu’ãi gueteri hikuái. Oñemboty ha oñetrankapa okyhyjégui hudío ruvichakuéragui. Ndorekói gueteri pe espíritu ombopy’a guasu vaerãva ichupekuéra.

Hesu ou oike iapytépe kuéra ha oipe’a umi tránka poguasu pe kyhyje ha py’a mirĩ omoingéva ikorasõme. Hesu oikévo ogueru py’aguapy, ha upéva ha’e hína Espíritu Santo rapykuere añete. Pe py’aguapy ha vy’a ñañandúva Ñandejára oime ramo ñanendive.

Hesu oipeju hese kuéra ha upévo ome’ẽ Espíritu Santo. Péva pe Espíritu osẽva ichugui hína,
ipytu marangatu omboguéva kyhyje ha py’a mirĩ, ome’ẽva py’aguasu.

Ñande avei ikatu ko múndo pýre jaikóvo jakyhyje ha ñatĩ ñañembo’e ha jaiko haguã tupaópe, ñamombe’u haguã jajeroviaha Ñandejárare, jahechauka haguã ñane rembiapo rupi ñande ha’eha cristiano.

Ñande rógape jepe sapy’ánte ñatĩma ñahenói haguã Ñandejára, Tupãsy ha sántokuérape. Ha upéva omo’ã Hesúpe ñande rekovépe, otranka ha omongañy ñane korasõ peteĩ kotypy ypytũ ramo guáicha. Ha upépe opyta ñande hegui Hesu kañymby, ha upekúevo ñande avei ñakañy ichugui.

Ajépa ñaikotevẽte upe Espíritu Santo, ome’ẽva py’aguasu, omboguéva kyhyje, ombopyahúva kyre’ỹ ha oipe’áva tape pyahu ñande rekovépe. Hi’ãite niko Hesu oipeju ñande rehe pe Espíritu Santo ipype oĩva, ñanemombaretéva jaropu’aka haguã opa mba’e py’a porã ha py’aguapýpe.

Hese ae ikatu ja’e he’i háicha San Pablo: ‘Opa mba’ére che pu’akáne Ñandejára chembokatupyry rupi’. Ja’e aipo ramo che irũ ha che reindy pe ñembo’e ko árapegua: Eju Espíritu Santo, eju ha embopyahu ore rekove.

Pa’i Alberto Luna.