Ñahendu Hesu. Martes Semana 19a TO

Escucha el evangelio y la reflexión en: https://youtu.be/Uff55WlFVXc

Martes 19a TO             

                                                         Mateo 18, 1-5.10.12-14.

 Upérõ, Jesús disípulo kuéra oñemboja hendápe, ha oporandu chupe:

— Máva piko pe tuichavéva Ñandejára Rréinope.

  Upépe Jesús ohenói peteĩ mitã ha omoĩ ijapytépekuéra.   

Upéi he’i: — Añete ha’e peẽme, ndapeikói jeýrõ mitãicha, ndapeike mo’ãi Ñandejára Rréinope.   Pe oñemomirĩva ko mitãicha, upéva tuichavéta Ñandejára Rréinope.   Peẽ perohory ramo mitã ko’ãichagua, chéve che rerohory hína.

     Aníke peapo’i umi ojeroviávape che rehe mitãicha. Cháke Ñandejára ángel kuéra yvágape oĩva oñangareko hína hese kuéra.

     Ja’éntena perekoha 100 ovecha, ha okañy pende hegui peteĩ. Mba’e pejapóne. Pehejáne umi 99 ñúme, ha pesẽne peheka pe okañy va’ekue. Ágã pejuhu vove, pevy’aitevéta ko peteĩ ovecháre umi 99 okañy’ỹ vaekuéregui. Péicha avei niko pende ru yvágape oĩva ndoipotái oñehundi peteĩnte jepe ko’ã michĩvéva che rehe ojeroviáva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oje’e ningo upérupi: “El que puede puede y el que no puede chĩa”. Pe imbarete ha iletrádo véva ojapo ojaposéva, ha pe ikangymi ha imbeguéva katu mitãicha opyta ochiã upépe hína. Pévante la hembýva ichupe. Ñande niko avei umi Hesu disípulo kuéraicha ñaimo’ã umi tuichavéva Ñandejára renondépe ha’etaha avei umi karai guasu omandáva, imba’e retáva, iñarandu ha oñemoñe’ẽ kuaáva, jahecha pype umíva itenonde, ojecha ramo ha oñemomba’e guasu opavave apytépe.

Hesu katu upéva rovái ohenói peteĩ mitã tavy, omoĩ ñane renondépe, ha he’i ñandéve tekotevẽha jaiko jey mitãicha, ñañemomirĩramo mante ikatúta jaike Ñandejára Rréinope. Japoi ramo ñandejehegui ipópe. Jajererovu ha ñaimo’ãramo ñande mba’e guasueteha niko nañaikotevẽ mo’ãi voi Ñandejárare ha avavére voi. Ha upéicha niko ijetu’u ñandéve jaike haguã Ñandejára ñanesãmbyhy hápe.

Ha mba’éichapa che irũ ha che reindy ikatúne aipóramo ñande jaike Ñandejára Rréinope. Hesu he’i umi michĩvéva ikatuha ñanembo’e. Ha upévare he’i avei ani haguã ja’apo’i ha ñamboyke ichupe kuéra. Cháke umíva tuicha ijavogádo amo yvágape he’i Hesu, ha Ñandejára oma’ẽ umi michĩvéva rehe, imboriahu, oikotevẽ ha ikangýgui omoĩva ijerovia hese.

Jajeasosiána upéicharamo umíva rehe. Ikatu haguãicha jaike ñande ave Ñandejára Rréinope, ani japyta okápe. Heta mba’e ikatu ñanembo’e umi mitã, ha umi mitãicha ojeroviáva Ñandejára rehe. Ñañembojave hese kuéra, ñahenduve ichupe kuéra, ñama’ẽ ha ñapenave hese kuéra, jaikuaa haguã yvága rape.

Pa’i Jasy