Ñahendu Jesús Ñe’ẽ. Miércoles 25º Durante el Año

Escucha el evangelio y la reflexión en: https://youtu.be/c7_A9GD9xbY?si=Az5zis-HNvkDNEZ_

Miércoles 25º Durante el Año

Lucas 9, 1 – 6

Upérõ Jesús ombyaty ijerére umi 12 idisípulope ha ome’ẽ chupe kuéra pu’aka omonguera hag̃ua opaichagua hasýva ha ipoguýpe omoĩ omosẽ hag̃ua opaichagua demóño. Upéi omondo chupe kuéra omyerakuã hag̃ua marandu porã Ñandejára Rréino rehegua.

He’i chupekuéra: — Anítei peraha mba’eve tapére g̃uarã. Ani peraha yvyra pende popegua, térã vosa, téra pende aviorã, térã pláta térã ao jopyru. Ha mamo óga peg̃uahẽháme, upépente pepyta pesẽtaha ára peve. Ha oimérõ pene mog̃uahẽse’ỹva katu, pesẽ upégui. Ha pesẽnguévo, peityvyro yvytĩmbo pende pýgui. Péicha oikuaáta hikuái pejaheiha hesekuéra.

Ha osẽ oho hikuái. Opaite puebloha rupi og̃uahẽ omyerakuã pe marandu porã ha omonguera opa hasývape.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Oiméramo ñande apytépe ñande rapicha ha’énte ojapopáva opa mba’e, ha ndohejáiva ambue oñe’ẽ térã omba’apo hendive, lo mitã he’i upéva ha’eha umeda. Ojagarrapáva, ha’énte voi omoñepyrũ ha omohu’ãva…

Sapy’ánte avei umi grúpo kuérape, organización, comité, movimiento, komunida, kapíllape, ha avei oiko partído polítiko, ha heta atýpe, jahecha umi omyakãva ymaite guive, oĩnte hína gueteri, ndaipóriramo guaícha hekoviarã. Ha’eteku oñemohatãva ha ndohejáiva avave oike hendaguépe. Ituja térã iguaiguĩmeve opyta ha nomopa’ũi ipyahumiéva oike haguã.

Jahecha katu Hesu ohenóiha iñirũrã, ohechakuaa ndaikatumo’ãiha ojapopa ha’eño upe Ñandejára omoĩ vaekue ipópe. Ha upémaro ombyaty ikatu vaerãva oipytyvõ ichupe. Ohechauka ñandéve tenonderã ojeroviaha umi ohenóivare. Ndaha’éi orekóva ijykére oma’ẽ haguã hesénte. Ojokuái katu ichupe kuéra Ñandejára rérape.

Omoĩ ichupekuéra tapépe, oiko haguã ichugui kuéra Ñandejára rembijokuái katupyry. He’i háicha ñe’ẽ: ‘tapére oiko la guéi.’ Ha upéi avei Hesu nahakate’ỹi oikuáava ha ombo’évare, noñongatúi ipu’aka.

Ombohasa uvei iñirũnguérape pe ha’e ombo’éva ombo’e haguã. Ha’e omosẽ háicha demóño, ha’e kuéra avei omosẽ haguã. Omonguera háicha hasýva ha’ekuéra avei tomonguera.

Iporãite va’erã ñande avei ñame’ẽramo ipyahuvévape toike toñembokatupyry ñande apytépe. Toñandu ñande rapicha jajeroviaha hese. Ñame’ẽ avei ichupe oñe’ẽ ha omyakã haguã. Upéva ningo hina upe “participación” ja’éva, ha tekotevẽtéva ñamoingeve ñande iglésia ha ñane retãme.

Pa’i Jasy.