Ñahendu Jesús Ñe’ẽ. Martes 25º Durante el Año

Escucha el evangelio y la reflexión en: https://youtu.be/KNp5ukq72w8

Martes 25º Durante el Año Lucas 8, 19 – 21

Upérõ ou Jesús rendápe isy ha tyvýrakuéra. Ndaikatúi oñemboja hikuái hendápe hetágui umi ojerepáva hese. Osẽ peteĩ he’i Jesúspe:— Nde sy ha nde ryvykuéra oime amo okápe hína. Nde rechase.

Jesús katu he’i: — Che sy ha che ryvy niko umi ohendúva ha ojapóva Ñandejára Ñe’ẽ.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Kuimba’e niko jareko ñande ryvy (hermano menor) ha ñande ryke’y (hermano mayor), oime ñane reindy ave (hermana). Kuñanguéra katu oreko tykéra (hermana mayor) ha ikypy’y (hermana menor), ha oime ikyvy kuimba’e (hermano). Ha umíva ha’ehína ñane pehengue ñane reñóigui ñande ru ha ñande sýgui.

Ikatu oime avei ñane hermano térã hermana, ha’éva ñande sýgui año, térã katu ñande rúgui año. Opaichagua niko ñaime. Oĩ avei ñane pehengue jarekóva ñane hermano-ramo, ñande sy ha ñande ru ha’égui ipaíno, térã katu ñande paíno ra’ykuéra.

“Hermano espiritual”, ja’éva hese. Opa umíva niko, ñande ru ha ñande sýicha, ndajaiporavói, oñeme’ẽntema ñandéve, jajuhúntema, ha jaguata hendivekuéra jaiko ypyguive ñamanomeve. Tuicha mba’e ko pe ñande familia. Ndaikatúi niko ñamboyke.

Opáichavo oimehína ñane irũnguéra ñande jaiporavóva, opa ára jarekóva ñande ykére, ñañandúva ñane pehenguéicha. Ha sapy’ánte umíva apytépe oime jahayhúva ñande py’aite guive ha jajepokuaavéva hese ñande rogaguágui.

Japo’o ha jakakuaa rire niko ñandéma ñandejehegui ñañemopeteĩ ha ñañemoirũ ñande rapicha ñandéicha oñandúva ha oguatáva rehe. Ñande idea orekóva avei. Ha umi ñane irũgui ou oiko ñane pehengue, ñande ryvy, ñane reindy, ha ñande sýicha.

Péva ningo la oikóva umi Jesús rehe ojeroviavaraka’e. Umi disípulo ha apóstolkuéra ningo ou oiko oñondive, ojeroviágui Jesús rehe. Omboja’o orekóva ha oñomoirũ tembiapo ha hemiandúpe.

Umivahína, he’i Jesús, ohendúva Ñandejára ñe’ẽ ha oñeha’ãva ojapo. Ha upéicha ñande ñañeha’ãramo jaiko niko ñandeja avei umíva apytépe.

Jesús niko ojapo ñande hegui peteĩ familia guasu, ndaha’éiva ñande ruguýrente ñañemosãva. Upe jerovia hesehína upe ñanemosãva ha ojapóva ñande hegui ipehengue.

Pe mborayhu ñañandúva Jesús-re ome’ẽta ñandéve aipóramo, hetaiteve ñande ryke’y, ñane reindy, ñande ryke, ñande kyvy ha ñande sy.

Erekópa che reindy ha nde che irũ peichagua nde rapicha reñemopeteĩva hendivekuéra nde jerovia, ne remiandu ha nde guatápe.

Pa’i Jasy.