Ñahendu Hesu Ñe’ẽ. Lunes 25º Durante el Año

Escucha el evangelio y la reflexión en: https://youtu.be/Wix6pw-0rNA

Lunes 25 Durante el Año Lucas 8, 16 – 18

Upérõ Jesús he’i idisípulokuérape: Máva piko omyendy lampĩu ha upéi omo’ã térã omoĩ tupaguýpe. Avave. Ñamyendy niko ha yvate jahupi opa oikéva ñande rógape ohecha hag̃ua. Ndaipóri niko mba’eve okañýva, osẽ’ỹ va’erãva okápe. Ndaipóri mba’eve oñemíva, ojekuaa’ỹ va’erãva.

Upévare, pejapysaka kuaáke. Upe oguerekóvape voi, oñeme’ẽvéta. Umi oguereko’ỹvagui katu, pe michĩmi oimo’ãva oguerekoha jepe ojepe’áta chugui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñahendu niko marandu rrádiope, jahecha télepe, térã katu jalee diáriope. Ha sapy’a ha’ete voi ku ndaipóriete voíva iporãva oikóva ñane retãme, térã ñande vállepe, ha’ete ku ñande aho’íva peteĩ pytũ guasu. Ha tuicha niko oguapy ñande rehe ñañandu ramo ivaipaha, iñypytũ vaicha ñande rekove. Oĩ voi ningo tapicha oikóva omoherakuã opaichagua mba’e vai, ivaíva mante omombe’u, omohũ ha ombotyai opa mba’e.

Omoinge ñande py’ápe vy’a’ỹ, ñande rape joko ha ñanemokangy. Oipe’a ñande hegui kyre’ỹ ñañeha’ã haguã jajapóvo tembiapo porã, jajerovia haguã, ha ñaipytyvõ haguã ñande rapichápe. Pytũmbyetépe japytáramo niko ipahápe jakyhyjéma voi ñamýi haguã.

Jesús imandu’a upe lampĩu ojeporúva yma ohesape haguã óga. Umi tembiapo porã, ñe’ẽ porã, hendýva ñande pype ha ñande apytépe ha’e hína upe ñande resapéva.

Peteĩ lampĩu, lámpara, linterna, tataindy niko, ndatuichái. Michĩramo jepe, ohesape porã ñande guatarã ha upe koty ñaimeha. Upéicha avei umi mba’e porã oikóva ñane retãme, ñande vállepe, ñande comunidad, ñande rógape, ohesape ha ome’ẽ esperanza hetápe.

Umi ñane remiandu ha idéa porã jarekóva, ñamombe’u va’erã avei, ani ñañongatu. Ja’e upe ñapensáva ha ñañandúva, osẽva py’a porã ha mborayhúgui. Ha upe jaikuáava ñambo’e ñande rapichápe. Ha upéicha avei jaheja upe máva he’i hemiandu porã, orekóva iñakãme, ñahendu ñande rapichápe, ñamomba’e avei ha jaguerohory umi mba’e osẽ porãva.

Umíva tesapeha hína ome’ẽva ñandéve py’a porã, omyesakãva ñande rekove ha omongakuaáva ñande jerovia. Retĩpa remombe’u haguã umi mba’e porã rejapo ha reñandúva che reindy ha nde che irũ. Reñandúpa rejechaukaséta vaicha ha rejejaposéta umíva reikóramo emombe’u. Jahupi katu la ñane lampĩu yvate ha ani ñamongañy.

Pa’i Jasy.