Ñahendu Jesús Ñe’ẽ. Miércoles 30º Durante el Año

Escucha el evangelio y la reflexión en: https://youtu.be/J9F7X4a4dMs

Miércoles 30° Durante el Año Lucas 13, 22 – 30

Jesús oho jave hína Jerusalénpe, opyta puebloha rupi hamba’e, ha upe rupi ombo’e. Ha peteĩ osẽ oporandu chupe: — Mbo’ehára, ndaheta mo’ãi umi ojesalvátava, aje.

Osẽ he’i Jesús: Peñeha’ã peike pe okẽ pychi’ĩ rupi. Cháke hetáta hína umi oikeséva Ñandejára Rréinope, ha ndaikatu mo’ãi oike. Ág̃a Ñandejára ombotývo hokẽ, peẽ okápe pepytáva peñemoĩne pesapukái: “Karai, eipe’ána oréve ne rokẽ.” Ha’e osẽne he’i peẽme: “Che ndapoikuaái.”

Ha upépe pesẽne peje chupe: “Roguapy va’ekue niko rokaru hamba’e ne ndive. Ha nde ore mbo’émi vaekue ore puéblo rupi.” Ha’e katu he’íta peẽme: “Che ndapoikuaái. Pe che reja, peẽ tekove ahẽ.” Ha okápe pepytávo, peñemoĩne pejahe’o soro ha peisu’u pene rembe, pehechávo Abraham, Isaac, Jacob ha opa umi proféta kuéra oĩva hína Ñandejára Rréinope.

Opáguio oĩta oúva oguapy okaru hag̃ua Ñandejára Rréinope. Ha upépe, umi ko’ág̃a itapykuéva, tenondete oguapýta. Ha umi ko’ág̃a itenondéva, itapykuéta.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Umi judiokuéra, niko oimo’ã hikuái ha’e haguére Abraham ñemoñare, tetã Israel gua, ha’ekuéra Ñandejára puebloha, ha ojesalváta mante voi katuete. Ha umi ndaha’éiva hesegua kuéra katu oñehundipáta. Ha’ekuéra ojerovia itenondetaha opavavégui oguahẽ vove Ñandejára Rréino.

Ñande apytépe avei oime péicha oñandúva. Oimo’ãva ñande karai haguére, ñañembo’e haguére sapy’a py’a, jaha haguére Caacupépe, térã mísa hápe, ñamyataindy haguére ñane sántokuérape, ñañembo’e rrosário, upéicha jajoguamaha ñane rendaguã púntaitépe amo yvágape. Térã ñande katóliko haguére ikatúma jajerovia, jaguapy ha ja’e, katuete jaiketaha ñande raẽvete yvágape javy’a Ñandejára ndive ágã ñaguahẽ vove ñambota hokẽ. Ha umi ndaha’éiva katóliko katu itapykuéta ñande hegui.

Hesu katu he’i heta umi ko’ágã oñemotenondéva itapykuetaha Ñandejára Rréinope. Ha heta umi umi ñaimo’ã’ỹva apytépe ikatúva itenonde ñandehegui. Ndaha’éiva katuete katóliko, ikaraíva, térã katu tupaogua. Oñeha’ãva ojapo iporãva hekovépe, ohekáva tekojoja, oiporiahuvereko ha oipytyvõva hapichápe, ndoikuaáiramo jepe Jesúspe. Ha ñande jaikuaáva chupe katu ñane ate’ỹgui ikatu ñande tapykue hetágui, ndajapytáiramo voi okápe mba’e ñañembyasy ha ñane rasẽ soro upépe.

Tekotevẽ ñañeha’ã, he’i Jesús. Jaike pe okẽ pychi’ĩ rupi. Ñañemomichĩ ha jahasa kuaáramo jejopy mante upérupi jaikéta. Mba’épa ere ichupe che irũ ha nde che reindy.

Pa’i Jasy.