Ñahendu Jesús Ñe’ẽ. 2 noviembre: Omano va’ekue ára

Escucha el evangelio y la reflexión en: https://youtu.be/n7EmfS4eQbM

2 noviembre: Omano va’ekue ára Lucas 24, 1 – 8

Domíngo pyhareve ko’ẽme umi kuña oho va’ekue Jerusalénpe Jesús ndive, oho upe itakuápe. Ogueraha hikuái umi mba’e ryakuã porã ombosako’i va’ekue.

Og̃uahẽvo katu, ojuhu pe ita ombotýva pe itakua juru noĩ veimaha hendápe. Ha oikévo hikuái, ndojuhúi Jesús retekue. Oñemondýi hikuái ha ndoikuaái mba’épa ojapóta. Ha peichahágui, hesaho sapy’a hikuái mokõi kuimba’ére oñembo’ýva hína pe ijypýpe.

Umi ijao morotĩ sakã ha omimbipa. Ha okyhyjégui opyta itĩndy hikuái. Umi kuimba’e katu he’i chupekuéra: — Mba’éreiko peheka oikovévape omanóva apytépe. Ndaipóri véima ápe.

Oikove jeýma. Na pene mandu’ái piko he’i hague peẽme oĩ ramo gueteri Galiléape, “Tekotevẽ niko chéve che reity hikuái heko vaíva pópe, upéi añemosãingo kurusúre, ha mbohapy ára haguépe aikove jey.” Upépe imandu’a hikuái upe Jesús he’i va’ekuére.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ko árape heta oime ohóva sementériope, omopotĩ, oitypei, ha opinta umi panteón oñeñotỹ hápe ihéntekuéra. Oguapy hikuái upépe oime, oterere, oñembo’e, omyataindy, ombojegua yvotýpe, ombopyahu kurusu paño ha mba’e. Ha imandu’a umi ihénte kuéra ñe’ẽngue ha hembiasa kue rehe. Oime voi oñe’ẽva hendivekuéra.

Ñande niko ja’e umi ñane hénte omanóva ojehekýi ñande hegui. Hi’ánga ojehekýi hetégui ha oho Ñandejára rendápe. Ha upe hetekue opyta háicha ñañotỹ haguã, upéicha avei opyta oñeñotỹ ñande pype mandu’arã heta mba’e jagueroguata va’ekue oñondive, iporãva ha ijetu’úva.

Jesús, ñande ryke’y guasúpe niko oañúa va’ekue avei pe mano. “Ñane reindy la muerte” -he’íva San Francisco- “anínte ñande juhu pecado vaiete ñande apére. Ha javy’aiténe ouvo ñande juhu jajapo Ñandejára rembipota”.

Jesús omano ojapóvo Ñandejára rembipota, heta jehasa asy pa’ũme. Omoirũ haguã heta ñande rapicha omano asýva ha pya’e pya’e, vai vaínte oñeñotỹva, háime oñemombóva yvykuápe. Péicha ningo Jesús oñemoĩ vaekue peteĩ itakuápe ojejo’óva omanóvape guarã, ojeporukávante chupe, ndorekóigui voi mamópa ho’áta anga omano.

Ha oimeko oiporiahuverekóva, ã kuña nguéra ohóva omopotĩ ha omohyakuã porã upe oñeñotỹ hague. Ndohejái tesaráipe. Umi kuña ohendu ypy raka’e Jesús oikove jeyha omanóva apytégui.

Ha péicha avei che reindy ha nde che irũ, ñande ñaromandu’ávo ñane pariénte amyrỹi, jahávo ñañandu upe oñeñotỹ haguépe, ñande jerovia he’i ñandéve umi ángelkuéra he’i va’ekue umi kuña nguérape: Oikove jevy, ndopytái upe oñeñotỹ háme. Oime Ñandejára ndive, ha upépe ñanera’arõ. Upeguive ñanemoirũ ha oñembo’e ñande rehe.

Pa’i Jasy.