Ñahendu Jesús Ñe’ẽ. Miércoles Semana 31ª Durante el Año

Escucha el evangelio y la reflexión en: https://youtu.be/1hJH9GNZ6oo?si=Vo47QUbt0Tt8om-_

Miércoles 31ª Durante el Año

Lucas 14, 25 – 33

Heta umi ohóva oikóvo Jesús ndive mamo ohoha rupi. Upéma ramo he’i chupekuéra: Peikosérõ che disípulo ramo, che rayhuve vaerã chéve pende rúgui, pende sýgui, pene rembirekógui, ha opa pene famíliakuéragui. Ndaikatúi peiko che disípulo ramo pene rakate’ỹ ramo pende rekovére. Na peiméi ramo pehupi haguã pende kurusu ha che moirũ, ndaikatúi peiko che disípulo ramo.

Ja’éntena pemopu’ãseha peteĩ tórre. Mba’e pejapo raẽ. Peguapy pehecha mbovýpa pende rupytýta peikuaa haguã perekópa hepyrã. Peicha’ỹrõ, peñepyrũ kuaa pemopu’ã ha ágã upéi tape ku’a rupi peso. Ha upéi ojepukapa pende rehe.

Osẽne he’i hikuái, “Ajépako nde výro. Reñepyrũ ha ndaikatúi ejapopa”. Ha mba’épa ojapóne peteĩ rréi 10 mil soldádonte oguerekóva ha osẽséva oñorãirõ 20 mil oguerekóva ndive ha oúva hína hi’ári.

Ohecha raẽta ikatúnepa ipu’aka pe oguerekóva reheve. Ha ohecha kuaávo ndai’ipu’aka mo’ãiha hapicháre, mombyrymi guive omondóne hendápe hembijokuái oñomongeta anivéma haguã oiko vai. Upévare ha’e peẽme, peikosérõ che disípulo ramo, pehejapa vaerã opa mba’e perekóva.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Heta mba’e niko oñemoñepyrũ kyre’ỹ pópe: tembiapo, aty, organización, projecto porã porã; ha umíva apytépe heta opyta tapére, noguahẽi hu’ãme. Ha oñeporandúramo mba’éiko oika raka’e, he’i lo mitã: “Opa rei, vaka piru ñorairõicha”.

Ñahendu niko Hesúre ojereha heta tapicha ha upémaramo he’i chupekuéra oikoséramo iñirũ tekotevẽha ojepoi tapépe omohu’ã haguãicha iguata. Ndaha’éi akã rakúgui rei, sapy’arãnte ñane renóiva. Ipuku hina ñande rape ipuku háicha ñande rekove. Mombyry jajesareko vaerã ha jaguatakuaa vaerã ani haguã tapére ñande pytupa.

Sapy’ánte ko ikatu jajerovia iterei ñande jehe. Ñaimo’ã ñande pu’akataha, opa oĩva jarahátaha ñande péchore Ñandejára rérape. Ñamoherakuã guasu, jarosapukái ha ñamombe’u opavavépe. Ha upéi katu haku vove yvy japyta ñane tindymi, ñakirirĩ guasu, ñande py’a mano ha jaguevi. Tuicha ipyenda ha itápia ñande róga, ha ndaitéchoi.

Iñarõ ko hina upe ñane kontrário ha itíro puku. Ndaha’éi sapukáipe ha ñemohã mbitípente ñamboguevítava ha ñande pu’akátava Aña ha ita’yrakuéra rehe. Tekotevẽ, jaikétaramo Hesu ndive, ñaime hendive ñande py’aite guive, ani ñande py’a mokõi ha ñande tarova. Ñaime vaerã ñahenonde’a haguãicha heta tie’ỹ, jehova api, oútava ñandéve ñaimo’ã’ỹve hágui. Opáichavo jaikuaa hendive jaguatáramo ñamohu’ã porãtaha katuete ñande rape.

Pa’i Jasy.