Ñahendu Hesu. Miércoles Semana 32ª TO

Escucha el evangelio y la reflexión en: https://youtu.be/VFs8ZLT6thE

Miércoles 32° TO

Lucas 17, 11 – 19

Upérõ Jesús ohóvo Jerusalénpe, ohasa Samaria ha Galiléa ojoajuha rupi. Ha og̃uahẽvo
peteĩ pueblo’ípe osẽ ohuvãitĩvo chupe 10 lepróso. Mombyrymi opyta hikuái Jesúsgui, ha
osapukái chupe: — Jesús, mbo’ehára. Ore poriahuverekomína.

Ha ohechávo chupe kuéra, Jesús osẽ he’i: — Tapeho pejechauka pa’ípe.
Ha oguata jave ohóvo, okuera hikuái. Ha peteĩ, ohecha kuaávo okueraha, ojevy Jesús
rendápe ha oguerohory oúvo Ñandejárape. Oho oñesũ Jesús renondépe omboja peve
isyva yvýre, ha oagradese chupe. Samariagua nimbo ra’e ha’e. Jesús osẽ he’i idisípulo
kuérape: — Ndaha’éi nga’u piko ra’e 10 umi okuera vaekue. Moõiko ohopa hikuái. Ha
mba’eichakue piko ko mombyryguávante pe oguerohorýva Ñandejárape.

Ha ojere he’i pe kuimba’épe: — Epu’ã tereho. Che rehe rejerovia haguére rekuera.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jahecha oĩha heta hasýva ha’ete ku ndokueraséiva. Ivísio vaíva ha’ete ku ndopoiséiva. Oikuaáva mba’épa upe ojapo vaíva hese ha opáichavo ojapo jeýnte. He’i porã ichupe doctor mba’épa ojapo vaerã ha nopenái hese. Oikuaa mamópa ndohói va’erã ha upe ndo’úi vaerãva, ha ho’u jeýnte. Ha upéicha ningo hasy lénto okuera haguã, ha rei oñembyasy ha hasẽta ndojapóiramo upe ikatúva omonguera ichupe.

Oñemboja niko Hesu rendápe hasýva lépragui, upéva ha’e vaekue mba’asy vai.
Hesu tiémpope ndaipóri vaekue pohã omongueráva. Ou hikuái ojerure asy, osapukái ha
oñembyasyka Hesúpe. Hesu katu noipohanói chupekuéra ojapo háicha jepi ambue
ndive. He’i chupe kuéra oho haguã pa’i rendápe.

Oĩ niko oipotáva Ñandejára oipohano chupe sapy’aitépe. Hesu katu omboguata chupekuéra, omoĩ chupe kuéra tupao rapére, oguatávo omohendáma haguã ohóvo hekove ha imandu’áma haguã ohóvo Ñandejárare okueraite mboyve.

Ñande rasýramo térã jarekóramo hasýva ñande rógape, iporã jaraha pa’i rendápe, ha ndaikatúiramo oho jajerure tou pa’i hendápe. Heta ko oĩ gueteri okyhyjéva ohenói haguã pa’ípe oiméramo hasýva hógape. Oimo’ã upéva omano haguãntema jajapóva ha nomondyiséi upe hasývape.

Iporãko jaikuaa che reindy ha nde che irũ, oime raẽva hasýva ikatuha ojerure pa’i oñembo’e hese. Ndaha’éi hasykatu etévante. Ituja ha iguaiguĩva, ndahasykatúiramo jepe, ikatu avei ohenói pa’ípe oñembo’e ha ohovasa haguã Ñandejára ñandy reheve.

Pa’i Jasy.