Ñahendu Jesús Ñe’ẽ. Miércoles Semana 26° TO

Escucha el evangelio y la reflexión en: https://youtu.be/by929tB5uEY

Miércoles 26ª TO

Lucas 9, 57–62

Upérõ Jesús ha umi hendive oĩva oguata jave ohóvo tapére, osẽ peteĩ he’i Jesúspe:
— Aháne nendive mamo rehohápe.

Ha Jesús he’i chupe: — Aguara’i niko oguereko ikeha, ha guyrakuéra hupa. Che,
kuimba’éicha aju va’ekue, katu ndarekói mamo ambojeko hag̃ua che akã.
Upéi Jesús he’i ambuépe: — Eju che ndive.

Ha’e katu he’i: — Che ra’arõna tañotỹ raẽ che ru, ha upéi taju.

Jesús katu he’i upévape:

— Eheja omanóva toñotỹ omanóvape. Nde tereho emyerakuã Ñandejára Réino.
Oĩ katu he’íva Jesúspe: — Mbo’ehára, che niko ahase nendive. Che ra’arõna taha raẽ
tamombe’u che rogayguápe, ha upéi taju nendive.

Jesús he’i chupe: — Arádo omoĩva ipópe ha oma’ẽ mantéva hapykuévo, upéva
na’iporãi Ñandejára Réino peg̃uarã.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñanemandu’ami umi purahéi ojejapóva polítika hápe, oĩ ningo he’ĩva:

“Amboykéne che machéte, che asáda, che árado, sapy’ánte che renõiro che partído”,
ambué katu he’i: “Ñamanórõ ñamanóne por el bien del Paraguay”. Ha he’ímiva voingo
avei Emiliano Cháco pýre osununúramo ohóvo, ipurahéi Rojas Silva rekávo pe: “Taheja
che ru che sy, taheja opa ahejáva, ko che retã rayhupápe tamano jepe che ave”.

Ha añete hape oiméramo jahayhu etereíva ningo nañambyasýi jehasa asy ha nañaponderái javorái ivaivéva rehe, oiméramo oikotevẽ mba’e ñande rehe ha ñanerenói.

Ha péva ningo pe Hesu he’íva umi omoirũsévape ichupe. Ojeity va’erãha añetehápe tapépe, toheja opa ohejáva Ñandejára rayhupápe, oha’arõ’ỹre jeiko porã ha oñemosã’ỹre hóga térã hóga guáre, itúva térã isýre jepe. Ha opoi paite haguã ijehegui Ñandejára pópe, ojerovia pype ha’e oñangareko ha ome’ẽne haguã opa oikotevẽva.

Tuicha mba’e hína pe Ñandejára oma’ẽ ñande rehe ha ñanerenói. Tuichave mba’e ñande partído, ñane retã ha ñande rogagua ñehenóigui. Ha umi oñandúva Hesu ohenoiha chupe iñirũrã ovy’a va’erã.

Ndépa che irũ ha che reindy reñandu Ñandejára nerenói ha ojevaleseha nde rehe.
Ha reikuaápa nde rapicha, kuña térã kuimba’e, ymave guare térã ko’ãgagua, oñandu
pypuku va’ekue pe Ñandejára ñehenói ha ome’ẽ mbaitéva ijehegui Ñandejára rayhupápe, oñeha’ãvo oiko Hesu oiko haguéicha ite.

Pa’i Jasy.