Ñahendu Jesús. Miguel, Gabriel ha Rafael ára

Escucha el evangelio y la reflexión en: https://youtu.be/0354drreL28

29 setiembre: San Miguel, Gabriel ha Rafael ára San Juan 1, 47 – 51

Upérõ Jesús ohecha Natanaélpe oguãhẽva ohóvo hendápe, ha he’i: — Amo oúva hína Israelgua añetete. Hendive ndaipóri japu.

Natanael he’i chupe: — Mba’eichakue piko nde che kuaa.

Jesús he’i chupe: — Rohecháma voi kuri aje’i, ku reguapy ramo hína pe ígo mataguýpe, Felipe ne renói mboyve.

Natanael he’i chupe: — Mbo’ehára, nde niko Ñandejára ra’y. Nde hína Israel rréi.

Jesús he’i chupe: — Péicha piko ere ha’e haguére ndéve rohecha hague reguapýrõ hína ígo mataguýpe. Tuichaiteve mba’e katu niko rehecháne ágã.

Upéi Jesús he’i chupe kuéra: — Añetéko ha’e peẽme. Pehecháne ágã yvága ojepe’a ramo ha Ñandejára ángel kuéra ojupi ha oguejy ramo che rendápe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Ojapuráva opytapáma va’ekue Boquerón pe”. Upéicha ningo he’i umi oho va’ekue oñorairõ Chákope 1932 guive 1935 peve. Pe Fortín Boquerón pe ndaje, oñepyrũvo ñorairõ, umi ipyahuvéva tuicha py’a guasu ha tuguy rakúre o’atropella vai guasúnte ikontrário oimo’ãgui ipu’akata ha omosẽtaha ichupekuéra.

Ha hetaiterei rasa ñande rapicha ndaje omano upépe. Ha upégui ae ou ohechakuaa hikuái pe ñorairõ ijetu’utaha. Ha ndaha’eiha hína apúrope ha peteĩ korrídapente omuñataha umi oñemohatãva upépe. Ha upémarõ oñemoĩ hikuái omongora ha omokangy ichupekuéra mbeguekatu. Ha pe 29 setiembre 1932, San Miguel ára ko’ẽme ipu’aka hese kuéra ha ohupi ñane bandera Fortín Boquerón pe. Iporã ko árape ñañakãitymi ñanemandu’ávo ñane ñembo’épe ñande ru yma rehe ha opavavete ñande rapicha kuéra omano va’ekue Chákope.

Oiméne ko avei pe ñande rekovépe heta jajuhútagui iñakã jaguáva, ha ñande rape jokoséva, Ñandejára omoĩ ñandéve umi Ánhel ruvicha, San Miguel, Gabriel ha Rafael ñane irũrã. Oñorairõ va’erãva ñande ykére ani haguã ipu’aka ñande rehe Aña rymbakuéra.

He’i ningo Jesús Natanaelpe omoirũramo ichupe ohechataha umi ánhel ojeréva hese, ojupi ha oguejyva iñakã ári.

Ha péicha che irũ ha che reindy, ndaipóri apúro hína. Una korrídape ndaikatu mo’ãi ñande pu’aka ha ñamosẽ ñande rekovégui opa mba’e vai. Tíro pukúpe katu ikatúmane ñagana ha jahupi avei Ñandejára Jesucristo bandera.

San Miguel ha’éva Ñandejára pyapy mbarete, San Gabriel ha’éva Ñandejára rekove omoheñóiva, ha San Rafael ha’éva Ñandejára pohã mbarete tañanepytyvõ, toipeju ipepo ñane akã ári, ñapyrũ hatãve haguã jahávo jaikóvo Jesús rapére.

Pa’i Jasy.