Ñahendu Hesu Ñe’ẽ. Lunes 26º Durante el Año

Escucha el evangelio y la reflexión en: https://youtu.be/3YVmq9W4OFE

Lunes 26º Durante el Año Lucas 9, 46 – 50

Umíva umi árape, Jesús disípulo kuéra oñemoĩ oñe’ẽ mávapa pe tuichavéva ijapytépekuéra, ha ojoavypa hikuái. Jesús ohecha kuaávo ojoavypaha hikuái, ohenói peteĩ mitã, omoĩ ijykére, ha he’i chupekuéra:— Mitã oguerohorýva, che rerohory chéve, ha oguerohory avei Ñandejára, che mbou va’ekuépe. Upévare, pe imirĩvéva pende apytépe, upéva hína upe tuichavéva.

Juan oporandu Jesúspe:— Mbo’ehára, rohecha niko kuri peteĩ omosẽva demóño nde rérape. Roho chupe ha rojoko, ndaha’éigui ñande apytepegua.

Jesús he’i chupe: — Ani pejoko. Umi opu’ã’ỹva ñande rehe niko oĩ ñane ndive.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñane mitãguive voi niko jaikova ñaha’ã mávapa tuichave. Mávapa iletradove, mávapa omandave, mávapa iñaranduve, ha umícha. Ha’ete ku ndajavy’áiva jahecháramo ñande rapicha ñande rasa imíva oime raẽva mba’épe.

Jesús apóstolkuéra oike avei upe tapépe ha oñemoĩ he’i ojupe mávapa upe tuichavéva ijapytépekuéra. Jesús katu ohupi peteĩ mitã ha ombo’e ichupekuéra pe jerovia añete Ñandejárare ojechauka jahayhúramo umi ñande apytépe michĩvévape, ikangy ha oñembotapykuévape. Upéicha jajapóramo, he’i Jesús, jaguerohory ichupe ha Túva Ñandejárape.

Ha uperiremínte apóstol kuéra ombojo’a he’ívo ojuhu hague hapicha omosẽva Aña Jesús rérape ha ndaha’éiva iñirũnguéra, ha ojoko hague hikuái. Upéicha avei sapy’a oiko ñande rehe ñande Iglésia pa’ũme.

Ñaimese oñoakã ári ha ñambovai upe ojapóva ñande rapicha ndaha’éiva ñande rehegua. Opaichagua ningo ñaime: Obispo, pa’i ha láico, oĩ pa’i religioso ha pa’i diocesano. Religioso oreko icongregación: franciscano, salesiano, redentorista, jesuita. Láicokuéra katu oreko imovimiento: Carismático, Cursillo, Schoenstat, Opus Dei, Catecumenado ha mba’e. Ha oĩ avei ñande parróquiape capillakuéra, ha ñande capilla pe oĩ jey grupo. Ha umícha hárupi sapy’ánte ñañomokyre’ỹ rangue jaiko jajohape joko. Ñañombopakova pire ha ñañemomombyry ojuehegui ñañemopeteĩ rangue.

Jesús katu ndojokói upe ojapóva iporãva hérape, ndaha’éiramo jepe iñirũ. Oguerohory katu ha nombovaíri. Ñanembo’e ñandéve avei che reindy ha che irũ, jaguerohorykuaa haguã umi tembiapo porã ojapóva ambue aty, grupo, movimiento ha Iglesia guáva. Upéva ndoipe’ái ñande hegui mba’evete. Peteĩ teĩme Ñandejára ohayhu ha ome’ẽ hendaguã. Peteĩ teĩme ñanembokatupyry ha ojevale ñande rehe.

Pa’i Jasy.