Ñahendu Hesu Ñe’ê. Domingo 01 de Diciembre

Escucha la reflexión en:  

Mateo 24, 37 – 44.

Upéro Jesús he’i idisípulokuérape:

Ojehu haguéicha umi árape Noé oikove ramo yvy ári, upéicha ojehu vaerã avei che aju jeyha ára. Umi árape ama guasu mboyve, opavave oiko vaekue okaru, omboy’u ha ñemendápe, Noé oike peve pe kanóa guasúpe.

Ha upéi oimo’ã’ỹhágui, ou pe ama guasu ha ohundipa opavavépe. Péichata avei che aju
jey vove. Upéva upe árape, mokõi kuimba’e oĩta hína oñondive ñúme, peteĩ ojereraháta
ha pe ambue katu ojehejáta. Mokõi kuña oñembisóta hína, peteĩ ojereraháta ha pe
ambue katu ojehejáta.

Pejesarekóke aipo ramo, ndapeikuaái hína araka’etépa oúta pende Jára. Perekóke
kóva pene akãme: Peteĩ óga jára oikuaa ramo araka’etépa oikéta hógape mondaha, ha’e
ndoke mo’ãi ha ndoheja mo’ãi avavépe oike hógape omonda haguã chupe. Upévare, peẽ
avei pejesareko vaerã. Peimo’ã’ỹve jave niko che aju jeýta.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Umi jahayhúva, ñane irũnguéra, ñane hénte niko jahechase, ñaimese hendive
kuéra, jajepokuaa ha javy’a oñondive. Mombyry ñaiméramo ojuehegui jajoechaga’úma
ha jajoheka. Ha jaikuaáramo outaha ñane rendápe ñanerembiayhu katu ñamohendapáma
opa mba’e ani haguã ohasa rei ñande hegui, jaguapy ha ñañemongeta puku haguã,
jakaru ha jaguata oñondive, jajoecha ramo ha ñañembojerovia.

Ajépa iporãite vaerã pe ñande rógape, ñamba’apohápe, ñande tupaópe, mísa
hápe, ñembo’épe, ñande atyhápe cristiano kuéra, jajoecha ramo avei, ñañomomaitei
ñaguahẽvo, ñañoanduve, ñañomongetave, ñaporandu ojupe ñande rekovére, jaikuaave
ojuehegui. Sapy’ánteko ikatu peteĩ ñande rapicha oúva jepi ndouvéi ha avave ndohechakuaái, noporandúi, mba’evérõ guáicha, ñakañy vaicha ojuehegui.

Oiméko hína pe mondaha ombokuáva ñande róga, oraháva ñande hegui ñane irũnguéra, oipo’óva ohóvo ñande tupaógui ñane hénte. Aníkena ñande jaheja omonandiete ñande hegui
ñande komunida.

Hesu ou ñane rendápe ñaimo’ã’ỹve jave, ha upéva hina ikatu porã pe ñane irũ, oguatáva ñanendive jeroviápe, ñande roguagua, ñande grupogua. Tekotevẽ upéva jaguerohory ha ñamoguahẽ vy’ápe, upéva ha’e ramo guáicha Hesu ñanemoirũva ñande guatápe.

Mba’épa reñandu che irũ ha nde che reindy, ko Navida rapére jahávo ema’ẽmi haguã mba’éichapa ikatu embojerovia ha embojere mieve umi okañýva nde hegui? Ikatúnepa evisita, ekonvida, emokyre’ỹ ha emoirũ Hesu rapére nde rapicha.

Pa’i Jasy.