Ñahendu Hesu Ñe’ê. Sábado 30 de Noviembre

Escucha la reflexión en:   https://youtu.be/3F-3UaCshrs

                                      Mateo 4, 18 – 22

Jesús oguata jave oikóvo lágo Galiléa rembe’ýre, ohecha Simón Pedro ha Andréspe. Ko’ãva niko ojoryvy, ha piráre ojeheka hikuái. Oity hína irréd ýpe. Jesús he’i chupe kuéra: — Peju che moirũ. Che ahechaukáta peẽme mba’éichapa peguerúta che rendápe che irũrã.

Upepete voi oheja hikuái irréd, ha oho hendive.

Ha ohomívo upégui, Jesús ojotopa Santiágo ha Juan ndive, ojoryvýva avei, Zebedeo ra’y mokõivéva. Oĩ itúva ndive hína hikuái, ha omyatyrõ irréd kanóape. Jesús ohenói chupe kuéra, ha oguejy hikuái ikanóagui, oheja itúvape, ha oho Jesús ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndaha’éi ningo opavave ñande rapicha ikatúva ombyaty ijerére hetápe. Oĩnte la isánto porãva ha ojeréva hese la hénte. Oĩ voi la ojehayhukáva, oreko kuaáva hapichápe ha upéicha ou ojepokuaa hese ha oiko hendive hapicha kuéra.

Ko árape ningo ñanemandu’a hína San Andrre apóstol ára. Kóva ningo San Pedro ryke’y raka’e, ojeheka vaekue piráre lágo rembe’ýre. Andrre niko iñepyrurã oiko vaekue Juan Bautísta irũ nguéra ndive, pe rrío Jordán rembe’ýre. Ha Hesu ohóramo guare oñemongaraika Juan Baustista pórupi pe rrío Jordánpe niko Juan Bautista he’i hese ha’eha Ñandejára remimbou. Upéva ohendúvo Andrre ha iñirũ San Juan oho voi omoirũ Hesúpe ha oiko ichugui pe Hesu irũ tenondetegua. 

Andrre niko oho upéi Pedro rendápe ha he’i chupe ojuhu hague Ñandejára remimbou ha ogueru ichupe Hesu renondépe. Ha upéicha mokõivéva opyta upe guive Hesu irũramo, oiko ichugui kuéra apóstol, Kirito rembijokuái omano meve.

Ha oguerúvo Hesu rendápe tyke’ýra Pedrope niko jahecháma mba’éichapa Andrre ojapo ohóvo upe Hesu he’i vaekue ichupe: Rombo’éta mba’éichapa rembyatýta chéve che irũra. Avei Hesu omongarúramo guare 5 mil héntepe, Andrre oheka ha ogueru vaekue Hesu rendápe peteĩ mitãrusu orekóva mokõi pira ha 5 pan, ha upévagui Hesu ojapo hetave opavavépe omongaru haguã.

Ha upéicha hína che reindy ha nde che irũ, natekotevẽi ñambyaty hetaiterei ñande rapicha. Peteĩ teĩ jaguerúva Hesu renondépe oikuaa haguã ichupe, ha michĩmi ñamoĩva ipópe, upévagui Hesu ojapóta hína tuicha mba’e hetápe guarã.

Ikatu ñande avei, ojapo haguéicha Andrre, ñakonvida ha jagueru ñande rapicha ou haguã Hesu rendápe, oikuaa haguã ichupe, ohendu haguã iñe’ẽ. Ha uperire ijeheguíntema opytáne oiméramo Ñandejára omosã ichupe iñirũra.

Pa’i Alberto Luna.