Ñahendu Hesu Ñe’ê. Domingo 03 de Noviembre

Escucha la reflexión en : https://youtu.be/fsK_1mAFcjE

Lucas 19, 1-10

Upérõ Jesús og̃uahẽ Jericópe, ha ohasa ohóvo pe puéblo rupi. Upépe oiko peteĩ kuimba’e irríkova hérava Zaqueo. Ha’e niko hína umi impuésto okovráva ruvicha. Zaqueo niko ohechase Jesúspe. Ha ndaikatúi ohecha chupe, hetágui umi hénte Jesús jerére oĩva, ha upéi ave, Zaqueo ikarape voi.

Odipara upémarõ Jesús renonderã ha oho ojupi peteĩ yvyra mátare. Upégui ohecháta hína Jesúspe ohasávo upe rupi. Ha ohasávo ohóvo Jesús, omaña yvatévo ha he’i Zaquéope: — Zaqueo, nde pya’e eguejy upégui. Nde rógape apytase hína.

Pya’ete oguejy Zaqueo, ha torypápe omog̃uahẽ Jesúspe hógape. Ha umi hénte ohechávo upéva, oñepyrũ oñe’ẽ Jesús rehe. He’i hikuái, “Mba’éicha piko aipo ohóta opyta peteĩ pekador rógape.”

Okarupa rire, Zaqueo opu’ã ha he’i Jesúspe: — Opa arekóva amboja’óta mbyte rupi ha ame’ẽta hénte mboriahúpe. Ha oime rire che rapichápe ambotavy ra’e, amyengoviáta chupe 4 vése hetave.

Jesús he’i chupe: — Ko árape nde ha opa nde rogaygua pejesalva, ndégui hína Abraham ñemoñare añetete. Che niko aju aheka ha asalva hag̃ua opa umi oñehundítavape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
Upe ojapóva ivaíva hapicháre ningo oheja vai ichupe. Pe omondáva, oinupáva, itie’ỹva hapicha ndive, ndohechakuaáiva hekópe hembiapo repykue hamba’e niko ombyai hapicha rekove, hete, ha oheja jepy’apy ha ñembyasýpe upe mávape. Ha upe jave avei pe hembiapo vaíva oñembyai ijupe voi, ombyai hekove ha ipy’a. Upe aña ha pochy, monda ha tie’ỹ, ñorairõ ha japu niko ndohejái avave py’ápe py’aguapy ha vy’a añete.

Ko karai Zaqueo, impuesto kovraha, niko ndaha’éi hína raka’e pohã ro’ysã. Ha’e ningo impuesto kovraha ruvicha ha la ipuésto rupi opo’ẽva oikóvo hapicha bolsíllope raka’e. Umi corrupción ojapóvaicha ñane retãme avei, ojavykýva imba’e’ỹva rehe, ohakã trosáva águio ha péguio, oipe’áva ikatu háicha hapichágui ijupe guarãnte.

Ha oikuaa porã ningo mitã Zaqueo la hembiapokue. Ha oñandúne raka’e ipy’ápe iky’aha la
hapykuere, ha tekotevẽha oñemopotĩ, oñembovevúi ha oñepohano ipy’aguapy haguã. Ha oikuaávo Hesu ohasataha ipuéblo rupi oiméne oñandu Ñandejára oipysoha ichupe ipo, osẽ haguã pe tujúgui. Ha ndojavyséi niko pe changui Ñandejára ome’ẽva. Ha ohóma katu oheka ichupe.

Umi ohekáva Ñandejárape ipy’aite guive ojuhúta katuete. Hesu oipohanose avei umi imba’eretáva monda repykuépe. Ha Zaqueo ohechakuaa tekotevẽha omyengovia pe omonda vaekue, omboja’o imba’e reta hembypáva, hapichágui oipe’a vaekue. Ha upéicha ou ipy’aguapy pe oñemonda va’ekue ha upe mondaha. Ha upéicha avei che irũ ha che reindy, umi tapicha heta rasa hendape’ỹ ombyatýva, corrupción rupive, ikatu avei ohupyty Ñandejára jehovasa ha py’aguapy, omboja’óramo mboriahu ndive ha omyengoviáramo monda repykue.

Pa’i Jasy.