Ñahendu Hesu Ñe’ê. Lunes 04 de Noviembre

Escucha la reflexión en : https://youtu.be/Xkr5sFfsEyo

Lucas 14, 1. 12 – 14

Upérõ pytu’uha árape, peteĩ fariséo ruvicha okonvida Jesúspe oho hag̃ua osena hendive
hógape. Opa umi oĩva upépe omaña joa hikuái Jesús rehe.

Jesús he’i pe chupe onkonvida vaekuépe: Rejapórõ karu guasu, árape térã pyhare, ani
ekonvida ne irũ nguérape, térã nde ryvy ha nde ryke’y kuérape, térã nde rogaguápe ha umi
rríko kuéra nde róga jere rupi oikóvape. Ág̃a upéi, ha’e kuéra ave ne konvidáne, ha péicha
repyta porã hendive kuéra. Ág̃a rejapo jeývo, ekonvida umi imboriahúvape, umi ipy
chékeva, iñepãva ha umi hesatũvape.

Ha’ekuéra niko ndaikatu mo’ãi ne konvida mba’evépe
ha ndaikatu mo’ãi omyengovia ndéve. Ñandejára katu tuicha nde rovasa vaerã ág̃a opa
hekojojáva oikove jeyha árape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe ñane sánto árape ningo jajapo jepi tembi’u porã, jajogua jay’umi vaerã, ha
ñakonvida ñane hénte kuérape, ñane irũ jahayhúvape. Oiméramo ñamboty aniversario, térã
katu oikóramo menda, mitã karai, quince áño, colación ha mba’e niko katuete umíva
ogueru vy’a ha oñemosã jepi karu guasu, jeroky, jotopa reheve, jaguerohory haguã
oñondive ñande rekove ha Ñandejára grásia porãita.

Ha umivarã ningo sapy’ánte oñekonvida karai guasukuéra, ojeheka mitã karaípe
guarã umi paíno ikatu vaerã upéi ojevale hese, umi mburuvicha oñemboguapy iporãvehápe
ha oñemongaru porã ágã upéi ojejerure haguãicha ñepytyvõ kompádre térã komádre ro’ópe.

Ha upéi ave jaikuaa ojejapoha karu guasu, jeroky, aty guasu ojajaipáva, hepy
hepýva, fiésta social oñehenóiva, ojejapóva oñeipytyvõ haguã mboriahu kuérape
hepykuére. Mboriahu kuéra katu ndohói upépe, umi ipláta hetávante. Oho ojechauka opyta
porã haguã ha oñeñe’ẽ porã haguã hese kuérante.

Hesu niko ohómiva umi karu guasu hápe, óga hárupi oñekonvidáramo vy’arã, menda hápe ha aty porãme ha’e oho avei okaru ha omboy’u hapicha kuéra ndive.

Ovy’akuaa ha’e hapicha kuéra ndive, ha ohecha avei mba’éichapa oĩ oñembotapykuéva. Ha
ombojoja pe Ñandejára Rréino, yvága pegua, karu guasu ha vy’a reheve. Upépe jepe, he’i
Hesu, itenondéta umi ko’ãga itapykuéva ha itapykuéta umi itenondéva. Ha upévare che
reindy ha nde che irũ, Hesu ñanembo’e javy’a kuaa haguã, jajejapo’ỹre ñande avei.

Ñakonvida mboriahu, hasývape, umi ndaikatúiva omyengovia ñandéve. Ñandejára ñande
rovasáta ha tuicha háicha omyengoviáta hína ñandéve amo ipahápe.

Pa’i Jasy.