Ñahendu Hesu Ñe’ê. Martes 05 de Noviembre

Escucha la reflexión en : https://youtu.be/Tg37NtQsla0

Lucas 14, 1. 15 – 24

Upérõ pytu’uha árape, peteĩ fariséo ruvicha okonvida Jesúspe oho hag̃ua osena hendive
hógape.

Osẽ peteĩ he’i Jesúspe: — Jehovasa tuichavéva ikatu va’erã jahupyty niko hína ág̃a ñaime
vove pe karu guasu Ñandejára Rréinope.

Jesús he’i chupe:
Peteĩ karai ndaje ojapóta peteĩ karu guasu nde tuicháva. Ha hetápe okonvida. Ha og̃uahẽvo
pe jekaruha óra, omondo hembiguáipe he’i hag̃ua opa umi oñekonvida vaekuépe, “Peho
kuaántema. Oĩmbáma tembi’u”.

Ha oñepyrũ peteĩ-teĩ he’i ndaikatu mo’ãiha oho. Peteĩ he’ika pe óga járape, “Péinako oime
ajogua ramo peteĩ yvy, ha ahase ahecha. Ehecha kuaamína chéve.” Ambue katu he’ika,
“Ajogua niko kuri 5 júnta guéi, ha aháta ahecha oikópa. Ehecha kuaamína chéve.” Oĩ ave
he’ikáva, “Amenda ramo. Ndaikatu mo’ãi aha.”

Pe tembiguái ojevy ha omombe’u hóga járape mba’épa he’ika chupe umi oñekonvida
vaekue. Ha tuicha ipochy pe karai upéva ohendúvo. Osẽ he’i hembiguáipe, “Pya’e rehóta
eheka pe okáre imboriahúva, ipy chékeva, hesatũva ha umi iñepãva. Erúta ápe okaru
hag̃ua.”

Upéi ou pe tembijokuái ha he’i hóga járape, “Karai, ajapóma pe ere vaekue chéve. Heta
rendaguã gueteri niko oĩ hína.” Osẽ pe óga jára he’i chupe, “Rehóta umi tapére opa rupi, ha
rejuhúvape eréta ou hag̃ua. Aipota henyhẽ che róga. Umi akonvida vaekue apytégui katu,
ndaipotái peteĩnte jepe oguapy ho’u che rembi’u.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jaháramo tupaópe, ñembo’e hápe, térã reunión hápe mba’e, ha jajuhúramo ñane irũ
jaikuaáva térã ñande vesíno okápe oguapy, ja’e chupe: “Jahápy”.

Katuete he’i va’erã hikuái:

“Enseguída”, térã katu, “ahátama ãgaite”. Ha jaikuaa ñande upéva ndoho mo’ãi hina,
he’ínte ohotaha. Ñaguahẽ mba’e ramo hendápe ha ñakonvida ñemongetápe porã niko
he’íne: “Iporãite chamigo, iporãite hulána. Añeha’ãmbaitéta ko aha ágã”. Ha upéi ndohói.

Hesu ombojoja pe Ñandejára réino peteĩ karu guasu Ñandejára ojapóva rehe ha
oime hape jeporavo pyre oñekonvidáva oho haguã oguapy pe mesápe. Ha oguahẽvo ára
umi oñekonvidáva oñemboheko, ha orekógui ambue mba’e ohayhuvéva, ombovy’avéva
chupekuéra ha omotenondéva, tove, he’i Ñandejárape. Ha ndohói.

Reñandúpa che reindy ha nde che irũ oimeha Ñandejára nekonvida ndéve avei
reñemboja haguã ijykére nde rapicha kuéra ndive. Mba’épa oime nde joko ha ne apytĩva ani
haguã eho upe Ñandejára nekonvida hápe.

Pa’i Jasy.