Ñahendu Hesu Ñe’ê. Domingo 22 de septiembre

Ñahendu Hesu Ñe’ê. Domingo 22 de septiembre 

                                                    Lucas 16, 1 – 13.   

Jesús omombe’u kóva ko káso idisípulo kuérape: Oiko ndaje raka’e peteĩ karai heta mba’e oguerekóva. Ha oje’e chupe ikapata oiporu vaipaha oikóvo ipláta.  Ohenói upémarõ ikapatápe ha he’i chupe, “Mba’éiko ko oje’éva nde rehe. Kuatiápe emoĩmbaitéta chéve mba’éichapa reiporu reikóvo ra’e che pláta. Ha upéva ipaha. Ne remba’apo véima ápe.”

     Pe kapatá he’i ipy’apýpe, “Mba’éiko ajapóta añemosẽrõ. Na che mbarete véima niko aiko hag̃ua a’yvyjo’o hamba’e. Ha upéi ave, atĩta asẽ hag̃ua upe rupi ajerure ha’u vaerã. Aikuaáma mba’épa ajapóta areko haguã che moguahẽva hógape añemosẽ rire.”

Ha ohenói peteĩ-teĩme umi pláta oiporu vaekue ipatróngui. Pe tenonde ou vaekuépe oporandu, “Mboýiko redeve che patrónpe”.  Ha he’i chupe, “Adeve chupe 100 barril aséite de oliva”. Pe kapatá he’i chupe, “Na’ápe nde kuatia, ha pya’e porã emoĩ 50”.  Upéva rapykueriguápe oporandu, “Ha nde piko mboy redevé”. Ha he’i chupe, “10 mil kílo trígo”. Pe kapatá he’i chupe, “Na’ápe nde kuatia, pya’e porã emoĩ 8 mil”.

     Pe kapatá patron oikuaávo upéva, oguerohory chupe ijapu haguére osẽ porã hag̃ua. Ha upéicha niko ojapo umi omba’apóva umi mba’e yvy ári guare. Ha’e kuéra niko ikatupyryve umi Ñandejára rembipota apóvonte oikóvagui.

     Upévare ha’e peẽme, peiporúke opa mba’e repy yvy arigua peñemoĩ porã hag̃ua heta ndive. Péicharõ ág̃a opa vove pendehegui pende pláta, Ñandejára pene mog̃uahẽne yvágape.

     Upe michĩ ra’ymíre oñangareko kuaávape niko, hetave mba’e ikatu jaheja ipópe. Ha upe michĩ ra’ymíme ipokarẽvape, ko’yteve ipokarẽta heta mba’e oñemoĩ ramo ipópe. Ha pende pópe ndaikatúi ramo jaheja pláta ra’ymi, pokarẽme oñembyatýva, piko máva ohejáta pende pópe umi mba’e ovaléva. Ha pende rapicha mba’e ndapereko kuaáirõ piko, máva ome’ẽta peẽme pene mba’e teéva.

     Patron niko ndajareko kuaái mokõi. Peteĩre na ñande’a’éi chéne ha jahayhuve pe ambuépe. Ha peteĩrente ñapenárõ, ñamboyke pe ambuépe. Ha upéicha avei, ndaikatúi ñambojerovia Ñandejárape ha pláta oñondive.

Ñandejára Hesukrísto ñe’ẽ. 

ÑAMBOGUEJY KO ÑANDEJÁRA ÑE’Ẽ ÑANDE REKOVÉPE

             Ñande niko ndaha’éi mundo ha tekove jára, ñaiménte hina herekuáramo, oñencarga ñandéve kapatáicha, ha oúta hina itiémpope ñande patrón ohecha mba’éichaitépa jaiporu upe ha’e oheja vaekue ñande pópe. Ha léire jahátaramo niko ndaipóri mo’ãi omohendapáva ikuénta Ñandejára renondépe. Ha mba’épa hemby ñandéve che irũ ha che reindy, ojepillátaramo oimeháguio ñande fajúto ha ñande ruguái pukuha. 

            He’i Hesu jaiporu jarekóva ñande pópe, plata, óga, tembiporu, arandu ha katupyry, ñambovevúi haguã ñande rapichápe hekove, ha’e kuéra avei ñandéicha heta odeve Tupãme. Ñaipytyvõ ojejopýva ha ñambovevúi ijúgo pohýivape. Ani ñambyasy upe japerdéva ñaipytyvõ haguã ñande rapichápe. Umíva ñanemoguahẽta hógape ha amo ipahápe omopotĩta ñandéve yvága rape. 

Pa’i Jasy.