Ñahendu Hesu Ñe’ê. Sábado 21 de septiembre : San Mateo ára

 Ñahendu Hesu Ñe’ê. Sábado 21 de septiembre : San Mateo ára   

                                               Mateo 9, 9 – 13

  Upérõ, Jesús oguata jave ohóvo, ohecha Mateópe oguapýva hína impuésto ojekovrahápe. Ha’e niko okovra impuésto Róma peg̃uarã. Jesús he’i chupe : 

— Eju che moirũ.

Mateo opu’ã ha oho hendive. 

 Upéi, Jesús oguapy jave mesápe, Mateo rógape, ou avei oguapy hendive kuéra umi impuésto okovráva Róma peg̃uarã. Ijaty avei hendive kuéra heta herakuã vaíva.  Umi Fariséo ohechávo upéva he’i Jesús disípulo kuérape: — Mba’éicha piko pene mbo’ehára oguapýta okaru impuésto kovraha ha herakuã vaíva ndive. 

  Jesús ohendúvo upéva, he’i chupe kuéra: — Hesãiva niko noikotevẽi médico, hasývante.  Tapeho peikuaa raẽ mba’épa Ñandejára he’ise raka’e iñe’ẽme ku he’írõ guáre: “Che aipota peiporiahuvereko pende rapichápe, pene ofrénda pegueru rangue chéve.” Che niko ndajúi ahenóivo imarangatúvape, pecadórpente. 

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndaha’éi niko oimeraẽvape ñamoguahẽva ñande rógape, ajépa. Ñakonvida niko okaru haguã ñanendive umi jahayhúva ha jaikuaáva, jajeroviáva rehegua. Ñame’ẽ ichupe kuéra pe iporãvéva jarekomívagui, ñambojerovia ovy’a haguãicha ñande apytépe ha imandu’a porã haguãicha ñande rehe. 

Ko árape ñanemandu’a hína San Mateo apóstol rehe. Omoguahẽ vaekue Hesúpe hógape. Hesu niko ojuhu vaekue Mateo pe hembiapópe, impuésto okovra jave hapichápe Róma peguarã. Ndaha’éi vaekue niko péva peteĩ tembiapo ojehecha porãva. Umi rrománo niko ndojehayhúi vaekue Hesu tiémpope. Ha’e kuéra niko mbaretépe okovra impuésto tetã Israel guápe. Naiporãi niko jaipe’a pláta  ñande rapichágui ñame’ẽ haguã upéi umi ñande reko vaívape. “Corrupción” ningo la Mateo rembiapo kuri. 

Hesu katu niko ohechávo Mateo pe oimeha upe tembiapo vaípe oiporiahuvereko ichupe ha onohẽ haguã upégui oñandu ikatuha oraha hendive iñirũrã. Ha opoi ichupe upe pinda, jahecha okarúpa hese. Ha mitã Mateo niko, oikuaa pype oimeha pe huguaitépe, oñandu Ñandejára opoiha ichupe peteĩ pióla oñeprende ha osẽ haguã tujukuágui. Ha upepete oñemosã Hesúre ha he’ipávo ichupe “eju chemoirũ”, opóma voi opu’ã ha ohejapa imesápe umi kuatia kuéra ha ohoite Hesu ndive. Oraha ichupe hógape, okaru hendive ha upete guive, hekove opa peve, oiko ichugui apóstol, Hesu irũ. 

Mba’épa che irũ ha che reindy umi ndéve nemosã ha neapytĩva Mateo pe omosã haguéicha. Oimépa neño ndaikatu mo’ãi esẽ upégui -Mateoicha avei ndaikatúi vaekue osẽ ijehegui- ha eikotevẽ avei eñemosã Hesúre, eñemosã nde rapicha kuéra rehe oguatáva Hesu ndive, Mateo oñemoirũ haguéicha umi Hesu ndive oguatáva rehe. 

Pa’i Alberto Luna.