Ñahendu Hesu Ñe’ê. Sábado 26 de octubre
26 octubre, 2019Ñahendu Hesu Ñe’ê. Lunes 28 de octubre
28 octubre, 2019
Escucha la reflexión en : https://youtu.be/TjCO3lN20CY
Lucas 18, 9 – 14
Ñahendu Hesu Ñe’ê. Domingo 27 de octubre
Upérõ ojapysaka hína Jesús rehe heta ojejapóva ha ojeroviáva ijehe ha oapo’íva hapichápe. ha Jesús omombe’u chupekuéra kóva ko káso:
“Oho ndaje tupaópe mokõi kuimba’e oñembo’évo. Peteĩva fariséo ha pe ambue katu impuésto kovraha. Pe fariséo oñembo’y ha oñembo’e kóicha: “Ñandejára, che aguyje ndéve na che mondáigui, nda che reko añáigui ha namyakãratĩrigui che rembirekópe. Ha upéi ave, ndajoguái amo impuésto kovrahápe. Ha upéva ári, ajapo ajúno mokõi ára pukukue peteĩ semánape, ha opa mba’égui ame’ẽ ndéve 10gui peteĩ.”
Pe impuésto kovraha katu oñemoha’eño mombyrymi, ha nda’ipy’ái voi ohupi haguã hesa jepe yvága gotyo. Ha oinupã-nupã ipyti’a, ha he’i: “Ñandejára, che poriahuverekókena. Pecador niko che.”
Upéi Jesús ojere he’i umi chupe ohendúvape: — Umi mokõi ojevývo hógape, Ñandejára oheja rei pe impuésto kovrahápe umi hembiapo vaikue, pe fariséope katu nahániri. Umi ojejapo ha oñembotuicháva niko oñemomichĩ vaerã ágã, ha umi oñemomichĩva katu oñembotuicháne.
Ñandejára Hesukrísto ñe’ẽ.
ÑAMBOGUEJY ÑANDE REKOVÉPE…
Ñañeha’ã niko jajapo hekópe opa mba’e. Ñañeha’ã ñamohendapa porã ñanerembiapo ha jajapopa opa mba’e otokáva ñandéve. Ha ñañeha’ã avei niko Ñandejára renondépe jaiko porã. Ñande jaroviáva ha tupaoguáva niko ñañeha’ã ñañembo’e, jaha mísa térã celebración hápe, ñamboguata ñande rogapy ha ñame’ẽ mimi ñande rapichápe hamba’e. Ha ikatu ñande jopi avei ko vícho ojopíva ko fariséope Hesu omombe’úva oho hague tupaópe. Ha’e ojapopáva hekópe umi mandamiénto he’i háicha ha upévare ojerovia ijehe, oimo’ãgui ha’e upéicha orekomaha ipópe upe jehovasa Ñandejáragui oúva. Oimo’ã ha’e orekoha tuicha crédito, ombyatýramo guáicha Ñandejára báncope ipirapire. Ha upévare tenondete voi oho, ha oñemoĩ oma’ẽ vai hapicha hembiapo vaívare ha oñemohembe jere hovái.
Pe impuésto kovraha katu itĩndy Ñandejára renondépe. Mombyrymínte opyta. Ha’e oikuaa porã hína ifajutoha ha ndaikatui oho oñemomba’e guasu gua’u Ñandejára renondépe. Otĩ voi chugui. Ohechakuaa ikuatia ky’aha, ha la hembýva ojerure Tupãme oiporiahuvereko haguã ichupe. Hesu he’i Ñandejára operdona hague pe oñemonáva yvýre ojehechakuáagui ha ndohovasái upe oúva itĩ pu’ã ha oñemomba’e guasu henondépe, jepevéramo ojapopa umi mandamiénto.
He’i ningo San Ignacio: ñande ñaime yvy ári ñamomba’e guasu haguã Ñandejárape, ñañakãity haguã henondépe ha jaservi haguã ichupe. Nda’ijái ñandéve ñanetĩ pu’ã henondépe ha ko’yteve nda’ijái ñande jajapo porã haguére ñane rembiapo ñaimo’ãma ñande mba’eguasuveha avavégui. Eñatendékena che irũ ha che reindy, ani reimo’ã eime porãveha avavégui, ejererovu ha ejavy pe Ñandejára grásia.
Pa’i Jasy.