Ñahendu Hesu Ñe’ê. Domingo 29 de septiembre

Ñahendu Hesu Ñe’ê. Domingo 29 de septiembre

                                               Lucas 16, 19 – 31. 

Upérõ Jesús he’i umi fariséo kuérape: “Oikómi vaekue ndaje raka’e peteĩ karai irríkova, oñemondéva ao hepy-hepyvévape. Ha ára ko’ẽre ojapómiva karu guasu neporã-porãva hógape. Hóga renondépe katu oñemoĩmiva peteĩ mboriahu chapĩ hérava Lázaro. Hete niko ikurupa ha umi jagua oúmiva oheréi umi ijaiha. Lázarope niko hi’ã ohupyty michĩmínte jepe umi tembi’u rembyre pe óga jára meságui oñemombóva.

    Peteĩ ko’ẽme Lázaro omano. Ha Ñandejára ángel kuéra ou ogueraha chupe yvágape ha omboguapy chupe Abraham ykére.

   Upéi, omano ave pe rríko ha ojereraha oñeñotỹ,  ha oho ojejuhu Aña retãme. Ha ohasa asy hágui hína upépe, ojesaupi sapy’a ha mombyry ohecha Abrahámpe, ha Lázarope ave oguapýva hína ijykére.  Ha oñemoĩ osapukái: “Che ru Abraham, che poriahuverekóna. Emondomína Lázarope tomyakỹ ikuã apymínte jepe ha tou tombopiro’y chéve che kũ. Vaípe niko ajecha hína ko tatápe.”  Abraham katu he’i chupe: “Che ra’y, na ne mandu’ái piko amo yvýpe reikovépe, hembypa hague ndéve opaite mba’e. Lázaro katu, ivaikuete ohupyty vaekue. Ko’ágã, ha’e opytu’u ha ovy’a hína ko’ápe, ha nde katu ivaikuete reisu’u.  Ha upéi ave, oĩ peteĩ yvykua pypuku ñane pa’ũme, ha avave ndaikatúi ohasa ko’águi upépe, térã upéguio ko’ápe.”

     Upépe pe rríko osẽ he’i: “Abraham, emondóna upéicharõ Lázarope che rogaygua kuéra rendápe.   Ha te’i umi 5 che ryvýpe anivéma haguã ojapo ivaíva ani ágã ha’e kuéra ave ou ho’a ko’ápe ha oiko asy.”   Abraham katu he’i chupe: “Umi nde ryvy nga’u piko ndoguerekói Ñandejára Ñe’ẽ. Umíva niko ohecha vaerã hikuái ha ojapo upépe he’íva.”  Pe rríko katu he’i: “Che ru Abraham, upéva niko na’iporãmbái. Peteĩ omano vaekue ohórõ hendápe kuéra, péicharõ oheja mba’éne hikuái heko vaikue.”  Abraham katu he’i chupe: “Nopenái ramo hikuái Moisés ha umi proféta kuérare, piko openáta gua’u peteĩ omanóva oikove jevy ramo.”

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Oime niko ñande rapicha mboriahu apĩ, okaru pokãva, oime oikóva kállere térã koty’i úle ha cartón guýpe, oime hasýva, ha’éñóva, ndaipóriva avave oma’ẽva hese. Ha umíva renondépe oime imba’e retáva, ndoiporupa mo’ãiva araka’eve orekóva, ha hi’arive ombyatyseve, ndaipóriramo guáicha hapicha mboriahu ndorekóiva upe ichupe hembýva. 

Hesu he’i ñandéve umi ombotýva ipy’a hapichápe, ndohechakuaái ha ndaipojeráiva oikotevẽva ndive, umíva ohundi hekove ha ombyaty iñaka ári táta ogue’ỹva.  Papa Francisco he’i ñahendu vaerãha mboriahu ojerure asýva. “Pe y ombogue háicha tata rendy guasu, upéicha avei ñame’ẽramo oikotevẽvape ñambogue ñande pekádo” (EG 193). 

Pe mboriahu apĩ, pe hasyetéva, ha’eñóva, ndorekóigui anga mba’eve ndaikatúi voi ojerovia ijehe, upe hembýva ichupe ojepokã hapicháre ha Ñandejárare, oñemoĩ ipópe ha ojerure asy ichupe upe oikotevẽva. Ha’e kuéra hína, che irũ ha che reindy, ñanembo’e mba’éichapa ñañemomichĩ vaerã Ñandejára renondépe ñande rovasa haguã. 

Pa’i Jasy.