Ñahendu Hesu Ñe’ê. Lunes 30 de septiembre

Ñahendu Hesu Ñe’ê. Lunes 30 de septiembre

                                                                                   Lucas 9, 46 – 50. 

Umíva umi árape, Jesús disípulo kuéra oñemoĩ oñe’ẽ mávapa pe tuichavéva ijapytépe kuéra, ha ojoavypa hikuái. Jesús ohecha kuaávo ojoavypaha hikuái, ohenói peteĩ mitã, omoĩ ijykére, ha he’i chupe kuéra:

—Mitã oguerohorýva, che rerohory chéve, ha oguerohory avei Ñandejára, che mbou vaekuépe. Upévare, pe imirĩvéva pende apytépe, upéva hína upe tuichavéva.Juan oporandu Jesúspe:

— Mbo’ehára, rohecha niko kuri peteĩ omosẽva demóño nde rérape. Roho chupe ha rojoko, ndaha’éigui ñande apytepegua.

Jesús he’i chupe: — Ani pejoko. Umi opu’ã’ỹva ñande rehe niko oĩ ñane ndive.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Ñane mitãguive voi niko jaikova ñaha’ã mávapa tuichave, mávapa iletradove, mávapa iplátave, mávapa iporãve, mávapa omandave, mávapa hóga porãve, mávapa ikateve, mávapa iñaranduve, ha umícha. Ha’ete ku ndajavy’áiva jahecháramo ñande rapicha ñande rasa imíva oime raẽva mba’épe, ha’ete ku ñañandúva oĩha ñande ári upévare, ha ñande ndajavaleiha nañaiméiramo ñande rapicha akã ári.  

Hesu apóstol kuéra oike avei upe tapépe ha oñemoĩ he’i ojupe mávapa upe tuichavéva ijapytépe kuéra. Hesu katu ohupi peteĩ mitã ha ombo’e ichupe kuéra pe jerovia añete Ñandejárare ojechauka jahayhúramo umi ñande apytépe michĩvévape, ikangy ha oñembotapykuévape. Upéicha jajapóramo, he’i Hesu, jaguerohory ichupe ha Túva Ñandejárape. 

Ha uperiremínte apóstol kuéra ombojo’a he’ívo ojuhu hague hapicha omosẽva aña Hesu rérape ha ndaha’éiva iñirũnguéra, ha ojoko hague hikuái. Upéicha avei sapy’a oiko ñande rehe ñande Iglésia pa’ũme, ñaimese oñoakã ári ha ñambovai upe ojapóva ñande rapicha ndaha’éiva ñande rehegua. Opaichagua ningo ñaime, heta atýpe ñaime, obispo, pa’i ha láico, oĩ pa’i religioso ha pa’i diocesano, religióso oreko icongregación: franciscano, salesiano, redentorista, jesuita, láico kuéra katu oreko imovimiento: carismátiko, Cursillo, Schoenstat, Opus Dei, Catecumenado hamba’e. Ha oĩ avei ñande parróquiape capilla kuéra, ha ñande capíllape oĩ jey grupo. Ha umícha hárupi sapy’ánte ñañomokyre’ỹ rangue jaiko jajohape joko, ñañombopakova pire, ñamohũ mohũ ojupe ndaha’éiramo ñande reheguáva, ha ñañemomombyry ojuehegui ñañemopeteĩ rangue. 

Hesu katu ndojokói upe ojapóva iporãva hérape, ndaha’éiramo jepe iñirũ, oguerohory katu ha nombovaíri. Ñanembo’e ñandéve avei che reindy ha che irũ, jaguerohorykuaa haguã umi tembiapo porã ojapóva ambue aty, grupo, movimiento ha Iglesiagua. Upéva ndoipe’ái ñande hegui mba’evete, peteĩ teĩme Ñandejára ohayhu ha ome’ẽ hendaguã, peteĩ teĩme ñanembokatupyry ha ojevale ñande rehe. 

Pa’i Jasy.