Ñahendu Hesu Ñe’ê. Martes 1 de octubre

Ñahendu Hesu Ñe’ê. Martes 1 de octubre 

                                                                       Lucas 9, 51 – 56

Oñemo’aguĩvo ára Jesús ojehupi hag̃ua yvágape, osẽ oho Jerusalénpe.  Omondo henonderã oho vaerãva ohecha chupe hendaguã Samariape. Umi Samariagua katu ndoipotái Jesúspe ijapytépe kuéra, oikuaágui hikuái ohoha hína Jerusalénpe.  Santiágo ha Juan oikuaávo upéva, osẽ he’i chupe: — Mbo’ehára, reipotápa roñembo’e Ñandejárape, ha toity ha’e tata yvágagui ohundipa hag̃ua ko’ãvape. 

 Jesús katu ojere oja’o chupe kuéra.

 Ha osẽ oho hikuái ambue puéblope.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Oĩ ningo ñande rapicha oiko vaíva ha ndaikatúiva ojuecha ha’e haguére ambue partido, ambue organización, ambue família, ambue távagua. Oñakontraria voi lo mitã, ojoavy haguére ireligiónpe, iclub, icoléhiope hamba’e. Ndaija’éi ojuehe, ha ndoikuaaséi ojuehegui mba’éve, ojotopáramo katu oñorairõ haguãntema voi. He’i háicha ojupe umi oiko vaíva: “ágante jajotopáta tape po’ípe hina”. 

Ñahendu angete mba’éichapa Hesu ohasa umi Samariagua válle rupi, ohóvo Jerusalénpe, ha umi Samariagua niko ndaija’éiva ha noñe’ẽiva umi hudío kuéra ndive, ha hudío kuéra katu ojeguaru voi ichugui kuéra. Hesu oikuaa porã Samaritano ha hudío kuéra noñe’ẽiha ojupe, opáichavo ojerure chupe kuéra opyta haguã hógape. Oñemboja ha oñe’ẽ umi ndaija’éiva hesekuéra rehe, ohechauka ñandéve ikatuha jaiko oñondive, ñañe’ẽ ojupe, ñañomoguahẽ, jajoavýramo jepe ñande idéape, ñande religión, ñande partídope. Upéva nde’iséi katuete jaiko vai vaerãha. Ikatu jaiko py’aguapýpe, ñañomongeta, jahechakuaa ojupe, ha ñamba’apo oñondive, ndaha’éi ramo jepe ojueheguáva. 

Umi samaritáno kuéra katu nomoguahẽséi Hesu ha iñirũnguérape. Omboty chugui kuéra hokẽ, ha ñahendúma mba’éichapa Santiago ha Juan ipochy eterei upévare ha he’i Hesúpe oityka haguã tata iñakã ári kuéra. Hesu katu oja’o Santiago ha Juánpe ha ohónte upégui ambue hendápe, otopa peve ipy’a porãvéva ha omoguahẽva ichupe kuéra. Upéva ohechauka avei ñandéve ndaha’e mo’ãiha pochýpe, ñorairõme, térã ñe’ẽ vaípe, ñambohovái vaerãha umi oñembotývape, upéicha ningo oñembotyvéta ha imombyryvéta ñande hegui. 

Mba’etekópa hína che irũ ha che reindy ñañandu ko Hesu ojapóva. Ñaimépa ñande avei ñañemoaiguĩ, ñañemongeta ha ñañomoirũ haguãicha ñande rapicha, kuña ha kuimba’éva, ambue tetã, térã religión, taha’e ambue partido guáva, taha’e ha’éva iñambuéva ñandehegui. Ikatúko oime ñaikotevẽ ñande avei Hesu ñanembo’e upéva, ombo’e haguéicha apóstol kuérape. Mba’épa reñandu. 

Pa’i Jasy.